முரண்களுக்குள் தொலையும் முழுமை

குழந்தையின் தற்கருத்தை, தனித்தியங்கும் ஆற்றலை, தேடல் திறனை ஊக்குவிக்கும் வகையில் இந்த முதல் உலகும், இரண்டாம் உலகும் மாறவேண்டிய, மாற்றப்பட வேண்டிய தேவை தனித்துவம் காக்க விரும்பும் எந்தச் சமூகத்திற்கும் அவசியமானதொன்று.


இந்த வகையில் குடும்ப உறுப்பினர்களோ, பாடசாலை ஆசிரியர்களோ குழந்தையின் ஆளுமை விருத்திக்கு உதவும் வகையில் தத்தமது அறிவு நிலை, சிந்தனை போன்றவற்றிலிருந்து ஒன்றில் மேலெழும்பவோ அல்லது கீழிறங்கவோ தயாராகி குழந்தைக்கும் அதன் உலகிற்குமிடையில் சம நிலைத் தன்மையைப் பேண உதவும் போது குழந்தை ஆளுமை விருத்தி தொடர்பான முரண்கள் மூழ்கடிக்கப்பட வாய்ப்புண்டு. குழந்தையின் முதல் உலகான குடும்பம் என்ற கருத்து நிலையில் ஆழ்ந்த உட்பொருள் இனவிருத்தி. இனவிருத்தி என்பதன் செம்மைப் படுத்தப்பட்ட பரந்த பொருள் ஆளுமையும், அறிவும் நிறைந்த உறுப்பினர்களாக உருவாக்குவதன் மூலம் தமக்கென தனித்துவ இன, பண்பாட்டு அடையாளங்களைக் கொண்ட சமூகத்தை உருவாக்குதல். ஆளுமை விருத்திக்கான அடித்தளம் குழந்தைப் பருவமே என்ற தெளிவு நிலைக்கமைய குழந்தைக்கும் குடும்பத்துக்கும் இடையிலான இடைவெளியை இயன்றவகையில் களைதலே முதல் மேற்கொள்ளப் பட வேண்டியது.

பலம், பலவீனம், தோற்றமைவு, அறிவு, நடத்தை, திறமை என்பன ஒன்றிணைந்து தற்கருத்தை தோற்றுவிக்கும். "இது அப்பாவின் செல்லம்", "இது என்ரை திரவியம்" போன்ற பிணைப்பைக் குறிக்கும் சொற்பிரயோகங்கள் சுழியன், கெட்டிக்காரன் போன்ற திறமையைக் குறிக்கும் சொற்பிரயோகங்கள் குழந்தை மனதில் ஆக்கபூர்வமான தற்கருத்தை ஏற்படுத்தி அதன் மூலம் திருப்தி, மகிழ்ச்சி போன்ற உணர்வுகளை ஏற்படுத்துவதனூடாக ஆளுமை விருத்திக்கு இட்டுச் செல்லும். மாறாக 'முட்டாள்', 'எருமை', 'தேவாங்கு' போன்ற சொற்பிரயோகங்கள் எதிர்மறைக் கருத்து நிலையை தோற்றுவித்து மன அழுத்தம், கோபம், ஒதுங்கிப் போகும் தன்மை என்பவற்றிற்கு இட்டுச் செல்லும்.



கண்டதையும் போட்டுடைக்கும் குழந்தையின் நடத்தைக்கு 'சுட்டித்தனம்' எனப்பெயரிட்டு குழந்தை எதிரிலேயே 'குளப்படிக் கந்தன்', 'முரட்டுச்சாமி' எனப் பெருமைப்படும் பெற்றோரோ பேரன் பேத்தியோ தமது செயல் ஊக்குவிக்கப் படுகின்றது என்ற மனோபாவத்தை குழந்தை மனதில் ஏற்படுத்தி, மேலும் மேலும் செய்யத் தூண்டும் ஆக்கிரமிப்பு மனோபாவத்திற்கு தாம் வழி கோலுகின்றோம் என்ற யதார்த்தத்தை உணர மறந்து விடுகின்றனர்.



'ஊத்தை, பினாட்டு, உறண்டை' போன்ற அசுத்தத்தைக் குறிக்கும் பிரயோகங்கள் சுத்தம் தொடர்பான கருத்து நிலையை மறக்கடித்து 'அழுக்கே சொர்க்கம்' என்ற மன நிலையை வளர்த்து விடக் கூடியது. 'கறுப்பி, மரமண்டையன், முழியன், கட்டைச்சி' போன்ற உருவமைப்பை குறிக்கப் பயன்படுத்தும் சொற்பதங்கள் குழந்தைக்குத் தன் தோற்றமைவு தொடர்பான தாழ்வு உணர்ச்சிக்கே இட்டுச் செல்வது மட்டுமன்றி பல அபாயகரமான பின் விளைவுகளையும் ஏற்படுத்தக் கூடியவை.

முழுக்க முழுக்க தகப்பனின் சாயலில் பிறந்த குழந்தையை அதனது பெயரில் அழைக்காது "மணியண்ணை வாங்கோ" என்று அதனது தகப்பனது பெயராலேயே அழைத்ததன் விளைவு தகப்பனின் பண்பற்ற தனத்தையும் குடிகாரக் குணத்தையும் சேர்த்தே குழந்தை உள்வாங்கிக் கொள்ள காரணமாயிருந்திருக்கின்றது.



சில இடங்களில் தாம் பிறந்தகையுடனோ அல்லது சிலகாலம் செல்லவோ தாயை அல்லது தகப்பனை இழந்துவிடும் குழந்தையை "தாயைத்தின்னி" என்றோ "தேப்பனைத் தின்னி" என்றோ பெரியோர் கூப்பிடுவதைப் பார்க்கின்றோம். இது தாழ்வுணர்ச்சியை உருவாக்கி பல அபாயகரமான விளைவுகளை ஏற்படுத்தவல்லது என்பதை நாம் உணரத் தவறி விடுகின்றோம். தேடலுக்கு ஒரு வேட்டு தன்னைத்தானே ஆராயும் நிலையை அடைதல் மனித வாழ்வில் பலருக்கு சாத்தியப் படுவதேயில்லை. ஆனால்தன்னைச் சுற்றியுள்ள சுற்றுப்புறத்தை ஆராயும் பண்போ குழந்தைப் பருவத்தின் மூன்றாவது வயதில் தொடங்கி எட்டாவது வயதில் தீவிரமாகச் செயற்படத் தொடங்கி விடுகின்றது. மூன்று வயதுக் குழந்தை ஒன்றின் ஏன், எதற்கு, எப்படி? என்ற வினாக்கள் மேதைகளையும் ஆட்டம் காண வைப்பவை.



குழந்தையின் சொல்லாட்சியில் மிகப் பெரும் பகுதியை ஆக்கிரமித்துள்ள வினாவாக்கியங்களை தீர ஆராய்ந்தோமானால் பெரும்பாலும் கண்முன்னே குழந்தை காணும் காட்சிகளையும், பொருட்களையும் பற்றியதாகவே அவை இருக்கும். "மழை எப்படி பெய்யுது? கத்தி ஏன் வெட்டுது? நாய் ஏன் வாலையாட்டுது?" போன்ற வினாக்கள் புலன்வழித் தொடர்புள்ளவை. ஆகக் குறைந்தது வீட்டில் பயன்படுத்தும் பொருட்களின் பின்னணியையாவது "அப்படியாம் இப்படியாம்" என்று 'கேள்விச் செவியன்' நிலையில் இல்லாது காரண காரியத் தொடர்புடன் பதிலளிக்க முயற்சித்தால் குழந்தையின் துருவி ஆராயும் பண்பை தேடலுக்கான களமாக மாற்ற முடியும். (பொருட்கள், இயற்கை நிகழ்வுகள் தொடர்பான தெளிவான இலகுவான விளக்கங்களைக் கொண்ட நூல்கள் நூலகங்களில் நிரம்பி வழிகின்றன என்பதையும் இங்கு குறிப்பிட்டே ஆகவேண்டும்.) ஆனால் பெரும்பாலும் நடப்பது.? கேள்விகளால் துளைத்தெடுக்கும் குழந்தையை "அலட்டல், தொணதொணப்பு, கிழட்டுக்கதை, அரியண்டம்" என்றும் அது போதாவிட்டால் "பிள்ளைபிடிகாரன் வாரான், பூதத்தைத் கூப்பிடுவன்" என்றும் அதுவும் போதாவிட்டால் "ஆக்கினை கூடிப்போச்சு, பள்ளிக்கு கெதியாச் சேர்த்தால்தான் சரி" என்றும் குழந்தையின் தேடலை முளையிலேயே கிள்ளியெறிதலே பரவலாக நடைபெறுவதாகும்.



துருவி ஆராயும் பண்பானது கேள்விகளால் துளைத்தெடுப்பதுடன் மட்டும் நின்றுவிடுவதில்லை. அது பொருட்களை புதிதாக தாமே முயன்று உருவாக்கும் தூண்டலை குழந்தையிடம் உருவாக்கக் கூடியது. கோயில் திருவிழாவில் வாங்கிக் கொடுக்கும் பம்பரமோ, ஊதுகுழலோ வீடு வந்து சேர்வதற்கிடையில் அக்குவேறு ஆணிவேறாய்க் கழற்றப் பட்டிருப்பதும், மை தீர்ந்த ஒறெக்ஸ் பேனாவின் மேல்மூடியும் கீழ்மூடியும் அகற்றப்பட்டு உடற் பகுதிக்கு இறப்பர் வளையம் பொருத்தி தென்னம் ஈர்க்கு பயன்படுத்தி ஏவுகணை விடுவதும் புதிதாய் உருவாக்கும் முயற்சியின் வெளிப்பாடுகளே என்பதை பலர் அறியும் வாய்ப்பு இல்லை. இன்று பெரும்பாலும் வீடுகளையும் முன்பள்ளிகளையும் நிறைத்திருப்பது உருவாக்க சக்தியை தூண்டாத பிளாஸ்ரிக் விளையாட்டுப் பொருட்களே. இதனால்தான் வாங்கிய சிறு காலத்துக்குள்ளேயே இவை அங்கொன்றும் இங்கொன்றுமாக தேடுவாரற்றுக் கிடப்பதும், புதுப்புது உருவாக்கத் திறனுக்குக் களம் அமைக்கும் மண் விளையாட்டு பெற்றோர் தடைச்சட்டம் போட்டாலும் கூட குழந்தைப் பருவத்தின் மிகவும் விருப்புக்குரிய விளையாட்டாகத் தொடர்ந்து நிலைத்திருப்பதும் உருவாக்கத்திறனை அதிகரிக்காத எதுவுமே குழந்தை மனதில் இடம்பிடிக்காது என்பதையே வெளிச்சமிட்டுக் காட்டுகின்றது.

முரண்களுக்கும், முரண்களுக்குமிடையே குழந்தையை வார்க்கும் முதலாவது பள்ளி குடும்பமென்றால் அதனைச் செப்பனிடும் அடுத்த பள்ளி பள்ளிக்கூடமே. குழந்தையின் துருவியாராயும் பண்பை, சந்தேகங்களை, தேடலைத் தீர்த்து வைப்பதில் இவை பெரும்பங்கு வகிக்கின்றன. குழந்தை பிறந்த கையுடனேயே தமக்கிடையில் நூறாயிரம் கோடி இணைப்புக்களை ஏற்படுத்தும் மூளையின் நியூரோன்களில் பயன்படுத்தப் படாதவற்றை உடனே மூளை தூக்கி வீசிவிடுமாம். தூண்டலை ஏற்படுத்தக் கூடிய சூழலும், அரவணைப்பும் எவ்வளவு கூடுதலாக இருக்கிறதோ அந்தளவுக்கு இந்த நியூரோன்களின் இணைப்பும் அதிகரிக்கிறதாம். மூன்று வயதுக்கிடையில் நன்கு அரவணைப்புக் கிட்டாத, தூண்டல் அற்ற குழந்தை இலகுவில் மாற்றமுடியாத குணாம்சங்களைத் தனக்குரியதாக ஆக்கிவிடும். இதனடிப்படையில் "பிறப்புக்கு முந்திய குழந்தையின் மூளை விருத்திக்கு எம்மால் உதவ முடியாவிட்டாலும் கூட நன்கு திட்டமிட்ட முன்பள்ளித் திட்டங்கள் மூலம் குழந்தையின் பிறப்புக்கு பின்னர் உள்ள கால கட்டங்களிலாவது நாம் நிறைய மாற்றங்களை ஏற்படுத்த முடியும்" என்ற குழந்தை நரம்பியல் நிபுணரான பிளரி சூகானியின் கூற்று கருத்தில் கொள்ளப்பட வேண்டியதொன்று. ஆனால் பெரும்பாலும் நாம் பார்ப்பது, '2-2' வயதுக்குள்ளேயே குழந்தையை முன்பள்ளியில் ஒப்படைத்து விட்டு சற்று ஆறுதலாக இருக்கக் கிடைத்தது வாய்ப்பென்று நினைக்கும் அன்னையரும், அறிவும், அனுபவமும், உடல் உள முதிர்ச்சியின்மையும் நிறைந்த ஆசிரியைகளை கொண்ட பெரும்பாலும் குழந்தை பராமரிப்பகங்களாக இருக்கும் முன் பள்ளிகளுமே. குழந்தையின் எதிரிலேயே அதன் சகோதரர்களை உறுக்குவதற்கு பெற்றோர் பயன்படுத்தும் "ரீச்சரிட்டைச் சொல்லி அடிவாங்கித் தாறன்", "இவனை கட்டி அவிழ்க்க ஏலாது. பள்ளிக்கு அனுப்ப வேண்டும்" என்ற சொற்பதங்கள் தேடலுக்கு களமாக இருக்க வேண்டிய பாடசாலைகளைச் சிறைச்சாலைகளாக உருப்படுத்தி காட்டுவதனால்தான் அழுகையும் புலம்பலுமாக சில சமயம் அடியும் குத்துமாக பிள்ளைகள் பெற்றோரால் பள்ளிக்கு இழுத்துச் செல்லப்படும் காட்சிகளை நாம் காண முடிகின்றது.

இதற்கு மாறாக, குழந்தையின் தேடலுக்கு களமமைத்துக் கொடுக்கக் கூடிய வீட்டுச் சூழலில் வளரும் குழந்தையானது பெருத்த கனவுகளுடனும் ஆர்வத்துடனும் பள்ளியை அணுகும் சந்தர்ப்பங்களில் அதனது தேடல் பசிக்கு போதிய தீனி கிடைக்காமல் போகும் போது அது விரக்திக்கும் சோர்வுக்கும் ஆட்பட்டு அந்தக் குழந்தைக்கும் கூட பாடசாலை சிறைச்சாலையாக மாறி விடுகின்றது. குடும்பத் தொடர்புகளும் தொடர் விளைவுகளும் குழந்தையின் முதல் உலகான குடும்பம் என்ற கருத்து நிலையில் ஆழ்ந்த உட்பொருள் இனவிருத்தி. இனவிருத்தி என்பதன் செம்மைப் படுத்தப் பட்ட பரந்த பொருள் ஆளுமையும், அறிவும் நிறைந்த உறுப்பினர்களாக உருவாக்குவதன் மூலம் தமக்கென தனித்துவ இன, பண்பாட்டு அடையாளங்களைக் கொண்ட சமூகத்தை உருவாக்குதல். ஆளுமை விருத்திக்கான அடித்தளம் குழந்தைப் பருவமே என்ற தெளிவு நிலைக்கமைய குழந்தைக்கும் குடும்பத்துக்கும் இடையிலான இடைவெளியை இயன்ற வகையில் களைதலே முதல் மேற் கொள்ளப்பட வேண்டியது.



ஆனால் எப்படிக் களைவது.? பெரும்பாலும் குழந்தைக்கும் அதன் முதலாவது தொடர்பாளரான தாய்க்கும் இடையே காணப்படும் இடைவெளிகளில் முதன்மையானது குழந்தையின் அதீத ஆர்வத்திற்கும் அதற்குப் பதில் சொல்லும் ஆற்றலின்மைக்கும் இடையிலான இடைவெளியேயாகும். அதே போல் குழந்தையின் தாய்க்கும் தந்தைக்கும் இடையிலான தொடர்பு நிலை பெரும்பாலும் அடக்கியாளும் பாலுக்கும் அடங்கிப் போகும் பாலுக்கும் இடையிலான தொடர்பாகக் குழந்தையின் தற்கருத்தைப் பாதிக்கும் தொடர்பாக அமைகின்றது. அதேபோல் குழந்தைக்கும் அதன் சக தோழருக்கும் இடையிலான தொடர்பானது குழந்தைக்கு ஏற்படுத்திக் கொடுக்கும் வாய்ப்பு வசதிகளுக்கும் மறுக்கப்படும் வாய்ப்பு வசதிகளுக்கும் இடையிலான முரண்பாடுகளாக குழந்தையின் உணர்வுகளில் தாக்கம் ஏற்படுத்தும் தொடர்பாக அமைகின்றது. தற்போதைய பிரதான பிரச்சினை குழந்தைக்கும் அதன் நேரடித் தொடர்பாளராக இருக்கும் தாய்க்கும் இடையில் நிலவும் இடைவெளியைச் சமநிலைக்கு கொண்டு வருவதேயாகும்.

கருப்பையில் இருக்கும் 10 மாதங்களும், பின்னுள்ள பாலூட்டும் காலத்திலும்தான் குழந்தை வளர்ப்பின் அடிக்கட்டுமானம் போடப் படுகின்றது. உலகமெங்கும் வீசும் பெண்ணிய அலை ஊர்க் கோடிவரை ஊடுருவி விட்ட போதும் இன்று வரை இங்கு குடும்பத்தின் தாங்குதூண் பெண்தான். பெண்ணின் படிப்பறிவும், பொருளாதார சுதந்திரமும் மிக வேகமாக இரட்டைச்சுமையை பெண்கள் மேல் ஏற்றியிருப்பதே கண்கூடாகப் பார்க்கப்படும் ஒன்று. படிப்பறிவு கூட வாழ்வியல் பட்டறிவுக்கு உதவுவதாக இல்லை. குழந்தையின் துருவி ஆராயும் பண்புக்கு, கேட்கும் கேள்விகளுக்கு பதில் சொல்லும் அளவுக்கு தாயின் அறிவு எட்டிப் பிடிக்கவேண்டும். குழந்தையின் தனித்தியங்கும் ஆற்றலையும், தேடல்த் தாகத்தையும் கட்டுப்படுத்த பிரயத்தனப் படும் தாய்மாரால் அதிகபட்சம் செய்ய முடிவதெல்லாம் "உம்மாண்டி வருகுது" என்று அச்சமூட்டி அவர்களின் ஆளுமையை இயன்றவகையில் சிதைப்பதே.



இரண்டாம் உலகின் முரண்கள் குழந்தைக்கும் அதன் இரண்டாவது உலகான பாடசாலைக்கும் இடையிலான உறவுநிலை பெரும்பாலும் அறிந்தவர் அறியாதவர், பெரியவர் சிறியவர் என்ற அடிப்படையிலேயே அமைந்துள்ளது. குழந்தையின் ஆளுமையை வடிவமைக்கவென மேல்நாட்டில் அறிமுகப்படுத்தப்பட்ட குழந்தை மையக் கல்வித் திட்டங்கள் அதைவிட வேகமாக இங்கு வந்துவிட்டதை மறுக்க முடியாது. ஆனால் மேலை நாடுகளில் குழந்தைக் கல்வியை வடிவமைப்பவர்களோ நேரடியாக ஆசிரியர்களாக இருக்கின்றனர். தமது பட்டறிவை அப்படியே உணர்வும் சதையுமாக ஊட்டுகின்றனர். ஆனால் இங்கோ படிப்பறிவும் பட்டறிவும் சமைக்கப்பட்ட அதிலும் உணவு தயாரிப்பின் அனுபவங்கள், படிப்பினைகள் எதுவுமின்றி சமைக்கப்பட்ட சத்துணவாக சுடச்சுட, அறிவும் அனுபவமும் அற்ற இளைய சமூகத்திற்கு பரிமாறப்பட அது கணநேர சுவையை, மகிழ்வை, உணர்வை மட்டுமே கொடுக்க குழந்தைக் கல்வி பழைய பாதையிலேயே தவழ்கின்றது.



"ஆரம்ப கட்ட போதனை முறை முழு எதிர்கால நம்பிக்கையுடையதாக இருக்க வேண்டும். ஒவ்வொரு குழந்தையும் தன் சக்திகள் மீது நம்பிக்கை வைக்க வேண்டும். ஒவ்வொரு பள்ளிநாள் குறித்தும் மகிழ வேண்டும். ஒவ்வொரு முறை ஆசிரியரைச் சந்திக்கும் போதும் சந்தோசப்பட வேண்டும். ஒவ்வொரு தடவை பாடத்திற்கு மணி அடிக்கும்போதும் உற்சாகப்பட வேண்டும்"

"தமது ஆசிரியர்களுக்குக் கோபம் ஏற்படுத்துவதற்காக குழந்தைகள் மறக்கவில்லை" போன்ற அற்புதமான கருத்துக்களை அள்ளித் தெளித்திருக்கும் குழந்தைகள் வாழ்க என்ற நூலை எழுதிய ரஸ்ய ஆசிரியரான அமனற்வீலி வெறும் ஆரம்ப பாடசாலை ஆசிரியர் மட்டுமல்ல. இவர் பிரபல சோவியத் விஞ்ஞானி, மனோதத்துவ இயலில் கலாநிதிப்பட்டம் பெற்றவர். பேராசிரியர். இத்தனை தகுதிகளுடனும் தனது 15 வருட ஆசிரிய அனுபவத்தின் வழி 6 வயதுக் குழந்தைக்கு படிப்புச் சொல்லித் தருவதற்கான இலகுவான விளக்கங்களை தந்திருக்கும் நூல் அது. குழந்தைக் கல்வியை நேரடியாக அங்கு செய்வதே மூளை பழுத்த, தலை நரைத்த மேதைகள்தான் என்பது "இவ்வளவு படித்துப் போட்டு அரிவரிக்கோ படிப்பிக்கிறது" என எதிர்ப்புக் குரல் எழுப்புபவர்களுக்கு வியப்பாகவும் வினோதமாகவுமே இருக்கும்.



முடிவாக, குழந்தையின் தற்கருத்தை, தனித்தியங்கும் ஆற்றலை, தேடல்த் திறனை ஊக்குவிக்கும் வகையில் இந்த முதல் உலகும் இரண்டாம் உலகும் மாற வேண்டிய, மாற்றப்பட வேண்டிய தேவை தனித்துவம் காக்க விரும்பும் எந்தச் சமூகத்திற்கும் அவசியமானதொன்று. இந்த வகையில் குடும்ப உறுப்பினர்களோ, பாடசாலை ஆசிரியர்களோ குழந்தையின் ஆளுமை விருத்திக்கு உதவும் வகையில் தத்தமது அறிவு நிலை, சிந்தனை போன்றவற்றிலிருந்து ஒன்றில் மேலெழும்பவோ அல்லது கீழிறங்கவோ தயாராகி குழந்தைக்கும் அதன் உலகிற்குமிடையில் சம நிலைத் தன்மையைப் பேண உதவும் போது குழந்தை ஆளுமை விருத்தி தொடர்பான முரண்கள் மூழ்கடிக்கப்பட வாய்ப்புண்டு.

விடலைகள் என்னும் விசித்திர உலகில் - 3

நீங்கள் எந்த ரகம்?

அன்பானவர்களா?
அன்பு என்ற மனவெழுச்சி தீவிரமடையும் போது வலியைத் கைகளால் தடவித் தணிக்கக் கூட வாய்ப்புக் கொடுக்காது சக தோழன் அல்லது தோழிக்கு நடு முதுகில் அழுத்தமாய்; ஒரு போடு போடச் சொல்லும். குழந்தையாயின் குழந்தை அழும் அளவுக்கு நெருக்கி அணைத்து முத்தம் கொடுக்கும். கொஞ்சம் வளர்ந்த குழந்தையாயின் குளறக் குளற உயரமான இடங்களில் இருத்தி வைக்கும். அல்லது தலை கீழாகத் தூக்கிப் பிடிக்கும். செல்லப்பிராணியாயின் வாலில் தூக்கிக் கொண்டு திரியத் தூண்டும் அல்லது படுக்கையறையில் கூட அணைத்துக் கொண்டு படுக்கச் சொல்லும். எதிர்ப்பாலாராயின் தனது இருப்பை உணர்த்தும் பொருட்டு அவர்களின் கண் படும் வகையில் ஓடித் திரியும். கத்தல்கள் சிணுங்கல்கள் வெடிச் சிரிப்புகள், மூலம் அவர்களது கவனத்தைத் திசை திருப்பும்.  சொல்லாத வேலையைக் கூட இழுத்துப் போட்டுக் கொண்டு விழுந்து விழுந்து  செய்யும்.
பாசம் என்ற மனவெழுச்சி சின்னச் சின்ன உதவிகள் மூலம் தான் நேசிப்பவரை மகிழ்வூட்டும். தான் நேசிப்பவர் சொல்லும் அல்லது செய்யும் ஒவ்வொன்றிலும் அதிக கவனம் செலுத்தும்., தான் நேசிப்பவருக்கு உண்மையாக இருக்கும்.

மகிழ்ச்சியுணர்வானது தனக்குப் பிடித்தவர் தன்னுடன் கதைத்தவை, நடந்து கொண்டவை அனைத்தையும் அவர்கள் இல்லாத போது நினைவில் கொண்டு கொடுப்புச் சிரிப்புடன் உலவ வைக்கும்.  தன்னை அடிக்கடி அழகுபடுத்தும்;, தனக்குள் பாட்டொன்றை முணுமுணுத்துக் கொண்டிருக்க வைக்கும். காரணமின்றிச் சிரித்துச் சிலசமயம் பித்துக்குளி என்றும் பேரெடுக்க வைக்கும். தீவிர முனைப்புடன் பணி செய்து கொண்டிருப்பவரை வெடிச்சிரிப்பால் குழப்பி அவரின்; முறைப்பையும் வாங்கிக் கட்டும். மகிழ்ச்சியுணர்வு தீவிரமாகும் போது அது களிப்பாக மாறி அவர்களை அந்தரத்தில் மிதப்பவர்களாக மாற்றுவதுமுண்டு..

சகல அம்சங்களையும் எப்படியாவது அறிய வேண்டும் என்று அங்கலாய்ப்பைத் தருவது ஆர்வம் என்ற மனவெழுச்சியே.  நண்பர்களோ அல்லது வயது வந்தவர்களோ பாலியல் தொடர்பான கதைகளை வாய் பிளந்து கேட்டுக் கொண்டிருப்பர். பாலுணர்வைத் தூண்டும் கதைப்புத்தகங்கள் சினிமா என்பன இவர்களை மகிழ்விப்பது போன்று வேறு எதுவுமே கிடையாது.; அறிவியல் சம்பவங்களோ, நடைமுறை விவகாரங்களோ எதையெடுத்தாலும் ஆர்வம் கொப்பளிக்க வலம் வரும் குழந்தைப் பருவத்தினரின் தேடல்கள் வளரிளம்பருவத்தில் வெறுமனே பாலியல் விவகாரங்களுடன் மட்டுப்படுத்தப்பட்டு விடுகின்றது.

அடிபிடிக்காரரா? 
கொந்தளிக்கும் உணர்வுள்ளோரிடம் உருவாகும் உச்சக் கட்டக் கோபம்;; கையில் கிடைத்தவற்றைத் தூக்கி எறியச் செய்யும், கண்டதையும் போட்டு நொருக்கச் செய்யும், போகும் போதும் வரும்போதும் கதவைப் படீரென அடிக்கச் செய்யும்;. ஆவேசம் மிகக் கொண்டு ருத்திர தாண்டவமாடச் செய்யும். குளறி அழப் பண்ணும். மாறாக, அழுத்த உணர்வுள்ளோராயின் புறுபுறுக்க அல்லது வாய் காட்டத் தூண்டும். கதைக்கும் மனோநிலையைச் சிதைக்கும். கதவை உட்புறம் தாளிட்டுக் கொண்டு உள்ளே அடைந்து கிடக்கச் சொல்லும். குத்தல் மொழியால் அடுத்தவரை நோகச் செய்யும். கோபத்தை அடக்கி வைத்துக்கொண்டு பழிவாங்கச் சந்தர்ப்பம் பார்த்துக் கொண்டு திரியும். கோபத்தைத் தீர்த்துக் கொள்ள முடியாத சந்தர்ப்பங்களில் அது விரக்தியாக மாறி கோபத்தை அப்பாவிகளிடம் தீர்த்துக் கொள்வதுமுண்டு.
கோபத்தின் வெளிப்பாட்டுக்கு மாறாக எரிச்சலுணர்வானது அடுத்தவரை ஒரு பொருட்டாக மதிப்பதைத் தவிர்க்கும். பெரும்பாலும் தனக்கு எரிச்சல் ஏற்படுத்துபவர்களிடமிருந்து கூடுதலாக விலகியிருக்கத் தூண்டும்.
விரக்தி என்ற மனவெழுச்சி இயலாமையை ஏற்படுத்தி பகற்கனவைத் தூண்டும். கதைப்புத்தகங்களில் தனக்கு பொருத்தமானவர்களைத் தேடும். சிலசமயங்களில் ஒன்றின் இல்லாமை தொடர்பான  விரக்தி நிலையானது தனக்கு பொருத்தமான செயற்பாடொன்றைத் தேர்வு செய்து அதில் பலத்த வெற்றியீட்டும் மன ஓர்மத்தை வளர்த்துவிடும்.

துக்கம் என்ற மனவெழுச்சி உணர்ச்சிப் பிழம்புகளாக இருப்போரைக் குளறி அழச் செய்யும். அழுகை கோழைத்தனமானது, பலவீனத்தின் வெளிப்பாடு என்று நினைப்பவராயின் வாய் பொத்தி விம்மச் செய்யும். விட்டத்தை நோக்கி வெறித்தபடி அமரச் செய்யும். எதையோ பறிகொடுத்தது போன்று நாடியில் முண்டு கொடுத்தபடி அல்லது தலையைத் தாங்கியபடி இருக்கச் செய்யும்;. சாப்பாட்டை ஒறுக்கச் செய்யும். தூக்கமின்றித் தவிக்கச் செய்யும். செய்யும் பணியில் மனதை ஒருமுகப்படுத்த முடியாமல் அல்லல்பட வைக்கும். நேசத்துக்குரியவரின் இழப்புக்கு தானும் ஒருவகையில் காரணம் என்று நினைத்து விட்டால் இழப்பைத் தனக்குக் கிடைத்த தண்டனையாகக் கருதி மனங் குமையச் செய்யும். சிலசமயம் இம்மனோநிலை தீவிரமடைந்து உள நோயாக மாறக் கூடும் அதற்கும் மேலே சென்று தற்கொலை முயற்சிக்கு இட்டுச் செல்வதுமுண்டு.

தான் மிகமிக நேசிக்கும் நபர் முன்னே தனது சில்மிஷங்கள் வெளிப்பட்டுவிடுமோ என்ற அச்சம் காரணமாக எழும் வெட்கம் காலால் நிலத்தில் கோலம் போடச் செய்யும், மறைவில் நின்று எட்டிப் பார்க்கத் தூண்டும், தனது செயற்பாடு தனது சூழலில் விரும்பத் தகாத மாற்றத்தை ஏற்படுத்தும் என்ற வெட்கம் அல்லது மன உளைச்சல் எதுவுமே நடக்காதது போன்று புத்தகத்துக்குள் முகத்தைப் புதைக்கச் சொல்லும், தூங்குவது போன்று பாவனை காட்டும். இயல்பிலேயே  நகம் கடிக்கும் பழக்கம் உள்ளோரை இரத்தம் வருமளவுக்கு நகத்தைப் பற்களால் பிய்த்து எறியச் செய்யும்;.  இறைச்சி; என்றால் மூக்குப் பிடிக்கப் போடும் சாப்பாட்டு ராமரைக் கூட மனதுக்குப் பிடித்த சாப்பாட்டைப் பிசைந்து கொண்டிருக்கச் செய்யும்.

முரண்டுபிடிப்புகள்
வளரிளம் பருவ உலகின் மிக முக்கியமான அம்சங்களில் ஒன்று இவ்வுலகிற்குள் கருக்கொள்ளும் எதிர்ப்புணர்வு அல்லது முரண்டுபிடிப்பு. சமூகத்தின் ஏற்றுக்கொள்ளப்பட்ட மரபுகளை மாற்றியமைத்தல் முடிந்தால் கதையையே முடித்துவிடுதல் என்ற வகையில் பழையனவற்றை முற்றாகக் கழித்து புதியவற்றை மட்டும் புகுத்த முனையும் இவர்கள் சமூகத்தைப் பொறுத்து 'பிரம்படி வாத்தியார்கள்' ஆக இருக்க விரும்புபவர்கள். மரபை மீறுதல் என்ற இந்தப் பண்பு காலங்காலமாகவே - குறிப்பாக கிரேக்க காலத்தி லிருந்தே -  இவர்களிடம் இனங்காணப்பட்டிருப்பினுங் கூட தற்காலம் வரை தொடர்ந்து நிலை கொண்டிருக்கும் விசேட அம்சங்களில் ஒன்றாக---, உலகளாவிய ரீதியில் பொதுசனத் தொடர்பு ஊடகங்களில் முக்கிய இடத்தைப் பிடித்திருக்கும் ஒன்றாக---, கணிசமானளவுக்குப் பிரபல்யம் பெற்று வரும் ஒன்றாக---, இருப்பதானது மானுடவியலாளர்கள், உளவியலாளர்கள், சமூகவியலாளர்கள்; இந்த 'மறக்கப்பட்டவர்கள்'மீது தனிக் கவனம் செலுத்த வேண்டிய நிலைக்கு இட்டுச் சென்றிருக்கிறது.

பொதுவாக வளரிளம் பருவத்தினரை இருவகையாகப் பாகுபடுத்தலாம். தாம் வாழும் சமூகம் ஒன்றின் விழுமியங்கள், நடத்தைகள் போன்றவற்றை --- அவை பிழையானதாக இருப்பினும் கூட 'ஆட்கள் என்ன நினைப்பினம்' என்று --- அப்படியே ஏற்றுக்கொள்பவர்கள் ஒரு வகையினர். சமூகத்தின் விழுமியங்கள், மரபுகளில் ஏதாவது ஒன்றையோ அல்லது அனைத்தையுமோ மீற முயல்பவர்கள் இன்னொரு வகையினர். முன்னவர் சமூகத்தின் பார்வையில் 'அச்சாப்' பிள்ளைகள். பின்னவர் குழப்பன்காசிகள்.


'அச்சாப் ' பிள்ளைகள்.
தமது கருத்து வேறானதாக இருப்பினும் கூட சமூகத்தின் பெரும்பாலானவர்களின் கருத்துடன் ஒத்துப் போகின்றவர்கள் இவர்கள். தோற்ற அமைவிலும் நடத்தையிலும் ஒத்துப் போகும் தன்மையானது தனது சகபாடிகள் மத்தியில் மட்டுமன்றிச் சமூகத்திலும் அங்கீகாரத்தை வழங்குகின்றது. தமது குழுவின் இலட்சியங்கள், நியமங்கள், கொள்கைகள், ஏன் சில சமயங்களில் ஒழுக்க நியமங்கள் கூட குழவின் ஒவ்வொரு உறுப்பினரும் பின்பற்றக் கூடிய வகையில் இருக்கும். தோற்ற அமைவில் ஒத்துப் போகும் அதேசமயம் மனதளவில் சமூகத்தின் விழுமியங்கள் மீது கேள்வியெழுப்புபவர்கள் கூட, தமது மனதில் ஏற்படும் கருத்து முரண்பாட்டை வெளியே சொல்லாத வரைக்கும் அவர்களுக்குக் கிடைக்கும் சமூக அங்கீகாரத்தில் பாதிப்பு ஏற்படும் வாய்ப்பில்லை. சிலசமயங்களில் சிலரிடம் இந்த அச்சாப் பிள்ளைத்தனம் அளவுக்கதிகமாகிச் செய்யும் ஒவ்வொரு செயலையும் மிக அச்சத்துடன் ஷஅவை என்ன நினைப்பினமோ---! இவை என்ன நினைப்பினமோ---! ஷ என்று நித்தம் செத்துச் செத்துப் பிழைக்கும் தன்மைக்கும் இட்டுச் செல்லும். எமது சமூகத்தில் இன்னொரு பிரிவினரையும் இனங்காண முடியும். கண்டதே காட்சி கொண்டதே கோலம் என்ற வகையில் பொதுசனத் தொடர்பு ஊடகங்களில் வரும் புதுப்புதுப் பாணிகளை அவை தமக்கு ஒவ்வாது விடினுங் கூட கைக்கொள்பவர்கள். ஒற்றைத் தோட்டுடன், தலை முடியை நீளமாக வளர்த்துக் கொண்டு வலம் வரும் ஆண் பிள்ளைகள், அங்கங்கள் அச்சொட்டாக அல்லது அசிங்கமாக வெளித் தெரியும் வகையில் இறுக்கமாக உடையணியும் பெண் பிள்ளைகள் கூட சமூகத்தின பார்வையில் அச்சாப் பிள்ளைகளே சீர்திருத்தச் சிந்தனைகளை நினைக்காத வரை---!

குழப்பன்காசிகள் 
சீர்திருத்தவாதிகள், புரட்சிக்காரர், தீவிரவாதிகள், ஹிப்பீஸ், குற்றவாளிகள், திருடர்கள் எனப் பலதரப்பட்டவர்களாக இனங்காணப்படும் இவர்களை இரு பெரும் பிரிவினராக வகைப்படுத்த முடியும். எதையும் சீர்தூக்கிப் பார்ப்பவர்கள் சீர்திருத்தவாதிகள் செயற்பாட்டாளர் என அடையாளப்படுத்தப்படுகின்றனர். மாறாக எதையும் சிதைத்து விடுபவர்கள் கிளர்ச்சிக்காரர், குற்றவாளிகள், மனமுறிவாளர் என அடையாளப்படுத்தப்படுகின்றனர். சமூகம் ஏன் திருந்த வேண்டும் என்ற தமது நியாயப்பாட்டுக்கு காரணம் சொல்லும் வல்லமையுள்ளவர்கள் சீர்திருத்தவாதிகள் எனப்படுகின்றனர். அகிம்சை வழிக்கே முன்னுரிமை வழங்கும் இவர்கள் எதுவும் முடியாத போதே மாற்று வழிகளைப் பற்றிச் சிந்திக்கின்றனர். அதைவிடச் சற்று மேலே போய் ஷஅடி உதையே அண்ணன் தம்பி திருந்த வழிஷ என்று தீர்வுகளுக்கு வன்முறைகளையும் வழிமுறையாகப் பிரயோகிப்பவர்கள் செயற்பாட்டாளர் எனப்படுகின்றனர். சமூகம் திருந்த வழிவகைகளைக் கூறும் திராணியற்ற அதேசமயம் கண்மூடித் தனமாகக் கண்டதையும் நொருக்குபவர்கள் கிளர்ச்சிக்காரர்கள் எனப்படுகின்றனர். சமூகத்தை 'திருத்த முடியாத கழுதைகள்' என முடிவெடுத்து விரக்தியடைந்து அதன்மூலம்   எதையும் சாதிக்கும் வல்லமையிழந்து துர்ப்பழக்கங்களுக்கு ஆளாகுபவர்கள் மனமுறிவாளர் எனப்படுகின்றனர். இவர்களைச் சற்று விரிவாகப் பார்ப்போம்.

சீர்திருத்தவாதிகள்---(Reformers)
பேச்சும் தோற்றமும் மரபுக்கு உட்படும் அதேசமயம் சிந்தனைகளும் நடத்தையும் புரட்சிகரமாக இருப்பவர்கள் சீர்திருத்தவாதிகள் எனப்படுகின்றனர். புரட்சிக்காரர், தீவிரவாதிகள், போராளிகள் போன்ற சொற்பதங்கள் இத்தகையோருக்கெனத் தோன்றியவையே. தனது வாழ்க்கையை மட்டுமன்றி சமூக உறுப்பினர்களின் வாழ்க்கையையும் முன்னேற்ற, திருத்தியமைக்க, செப்பனிட விரும்புபவர்கள் இவர்கள். வளரிளம் பருவத்தினரிடம் காணப்படும் காணப்படும் எதிர்ப்புணர்வை நேர்க்கணியமாக நோக்கின் எந்தவொரு பிரச்சனையையும் தீர்க்கும் ஆற்றல், நிலைமைகளைச் சீர்திருத்திவிடும் ஆற்றல், முன்னேற்றமடையச் செய்யும் ஆற்றல் மற்றவர்களிலும் பார்க்க  தனக்கு உண்டு என்ற உண்மையான நம்பிக்கை இவர்களை சீர்திருத்தவாதி என்ற நிலைக்கு இ.ட்டுச் செல்கின்றது. சமூகத்தின்; ஏற்றுக்கொள்ளப்பட்ட வடிவங்களில் பிழை கண்டுபிடிப்பதுடன் நின்று விடாது  வடிவங்களைச் சீர்;ப்படுத்துவதற்கு ஆலோசனை சொல்லும் வல்லமையும் இவர்களுக்கு உண்டு. பொதுவாகவே சீர்திருத்தவாதிகள் அமைதியும் ஆழமும் மிக்கவர்கள். சிறுவயதில் ஷஅமசடக்கிஷ எனப் பெயரெடுப்பவர்கள். எதையும் கண்டும் காணாதது போல் காட்டிக் கொள்ளும் இவர்களின் பார்வையிலிருந்து எதுவுமே தப்புவதில்லை. உலகமே இடிந்து விழுந்தாலும் பதட்டப்படாதவர்கள் போன்று புத்தகத்துக்குள் தலையை நுழைத்துக் கொள்ளும் போக்கை இவர்களிடம் சிறுவயது முதலே அவதானிக்கலாம். ஆக மிஞசிப் போனால் தமது எதிர்ப்புணர்வை மூஞ்சியை நீட்டுதலுடன், சிறு முணுமுணுப்புடன் மட்டும் நிறுத்திக் கொள்ளும் இவர்கள் வாய்த்தர்க்கங்களைக் கூட மிக மட்டுப்படுத்தப்பட்ட அளவிலேயே கைக்கொள்வர்

ஆரம்ப காலங்களில் 'உதவாக்கரை' களின் பட்டியலில் இவர்களைச் சமூகம் உள்ளடக்கி ஒதுக்கி வைத்தாலும்; இவர்களது சீர்திருத்தச் சிந்தனைகள் சமூகத்தை ஆரோக்கிய பாதையில் இட்டுச் செல்லும் ஒரு சந்தர்ப்பத்தில்;  சமூகத்தால் மாலையிட்டுக் கௌரவிக்கப்படுபவர்களும் இவர்கள் தான். இவர்களது சிந்தனைகள் ஏனையோரைப் பொறுத்து நடைமுறைக்குச் சாத்தியமற்றதாக உணரப்பட்டாலும் கூட தற்போது சமூகத்தில் நிலை கொண்டிருக்கும் பலவீனங்களைச் சுட்டிக்காட்டி சமூகத்தில் மாற்றம் தேவை என்று இவர்கள் மற்றவர்களில்  ஏற்படுத்தும் விழிப்புணர்வு பலவீனங்களை இல்லாதொழித்து முன்னேற்றத்தை கொண்டு வர பெரிதும் உதவக் கூடியதொன்று. ஒதுக்கப்பட்டவர்களுக்கு ஆதரவாகக் குரல் கெர்டுத்து போராடிய இராஜாராம் மேகன்ராய், அம்பேத்கார், பெண் சுதந்திரம் வேண்டி நின்ற பெரியார் போன்றவர்களை இவர்களுக்கு எடுத்துக் காட்டாகக் கொள்ளலாம்..

செயற்பாட்டாளர் ( Activists)
சீர்திருத்தவாதிகளைப் போலன்றி மாற்றங்களைக் கொண்டுவருவதற்குச் சமூகரீதியில் ஏற்றுக்கொள்ளப்படாத ஆக்கிரமிப்புச் சார்ந்த வழிமுறைகளைப் பின்பற்றுபவர்கள் இவர்கள்;. எல்லாச் செயற்பாட்டாளரும் சீர்திருத்தவாதிகளாக இருக்கலாம். ஆனால் எல்லாச் சீர்திருத்தவாதிகளும் செயற்பாட்டாளராக இருப்பதில்லை என்பதையும் இங்கு கவனத்தில் கொள்வது அவசியம். வளரிளம் பருவத்துப் பிள்ளையின் செயற்பாடு அதன் நண்பர் குழாமினால் ஏற்றுக்கொள்ளப்படும் போது சமூக ரீதியில் அவர் செயற்பாட்டாளராக மாறும் தன்மையை வலுப்படுத்துகின்றது. சமூகத்தின் 'பத்தாம்பசலித்தன' த்தை நீக்கி சமூகத்தை மேம்படுத்துவதற்கான ஒரே வழி செயற்படுவாதம் தான் என்ற நம்பிக்கையே சமூகம் சார்ந்து ஏற்படும் விரக்திகளிலிருந்து இவர்களை விடுபட  வழி சமைக்கும். மாறாக  தனது சுயதிருப்திக்காக மட்டும் செயற்படுவாதத்தை இவர்கள் பின்பற்றினால் செயற்பாட்டாளர்களினால் மேற்கொள்ளப்படும் எதிர்ப்புப் போராட்டங்களில் பங்குபற்றுதலானது இவர்களுக்குத் தற்காலிக திருப்தியையே தரும். பெரும்பாலான பெண்ணிய இயக்கங்கள் சீர்திருத்தவாதிகளை விட செயற்பாட்டாளரையே அதிகம் கொண்டிருப்பது இங்கு கவனத்தில் கொள்ள வேண்டியதொன்று. தமது சிந்தனைகளுக்கு ஆர்ப்பாட்டங்கள் மூலம் செயல் வடிவம் கொடுக்க விரும்பும் இவர்கள் விரும்பிய பலனைப் பெறாத பட்சத்தில் மேலும் தீவிரமாகிப் பொதுச் சொத்துகளுக்குச் சேதம் விளைவிக்கும் நடவடிக்கைகளையும் மேற்கொள்கின்றனர்.

கிளர்ச்சிக்காரர் (Rebels)
இத்தகையோர் தமது எதிர்ப்பணர்வுக்கான சரியான காரணத்தைத் தெளிவுபடுத்துவதில்லை. ஷஇது சரியில்லைஷ ஷஎன்னால் முடியாதுஷ என்ற கூற்றுக்கள் மூலம் சமூக எதிர்பார்ப்பை மறுத்துவிடுவதைத் தவிர மேலதிகமாக இவர்களால் எதுவும் செய்ய முடியாது. ஒழுங்குகள் நியமங்களை மொட்டையாக மறுத்துவிடும் போக்குக் காரணமாக ஷசகிக்க முடியாததுஷ ஷஏற்றுக்கொள்ள முடியாததுஷ எனக் கருதும் எந்தவொரு நிலைமைக்கும் பரிகாரம் காணும் வல்லமையை இவர்கள் இழந்துவிடுகின்றனர். வால் இருக்கத் தும்பியைப் பிடித்த கதையாக வேலை நிறுத்தங்கள், பகிஷ்கரிப்புப் போராட்டங்கள் போன்றவற்றில் கண்ணாடிகள், மேசை, கதிரை போன்றவற்றை அடித்து நொருக்குதல் இத்தகைய மனோபாவத்தின் வெளிப்பாடுகளே. இக் கிளர்ச்சி மனோபாவம் உச்சக்கட்டமடையும் போது ஷஏவல் பேய் கூரையைப் பிடுங்கியஷ கதையாகக் கண்டதையும் அடித்து நொருக்குதல், தீயிட்டுக் கொழுத்துதல் போன்ற செயற்பாடுகளை இவர்கள் மேற்கொள்வர். இவர்களது செயற்பாடுகள் மேலும் தீவிரமடையும் போது தன் மீது தனக்கே நம்பிக்கையீனம், எடுத்ததற்கெல்லாம் குற்றம் கண்டுபிடிக்கும் மனோபாவம் போன்றவற்றால் மனமுறிவாளராக இவர்கள் மாறிவிடுகின்றனர.;

மனமுறிவாளர் ( Alienators)

இவர்களுக்கு ஆதரவான காரணங்களை விட எதிரான காரணங்களே மிக அதிகம். சமூகத்தைத் திருத்துவதற்கு தமது சொந்த அனுபங்களிலிருந்து அர்த்தம் காண முயல்பவர்கள் இவர்கள். சமூக ரீதியில் நல்லது கெட்டதைப் பற்றிச் சிந்திக்கும் தன்மையற்ற, தன்முனைப்புள்ள இவர்கள் தமது தனித்துவம், சுதந்திரம் என்பவற்றை அடிப்படையாகக் கொண்டே எதையும் மதிப்பிட முயல்கின்றனர். அதன் மூலம் எதையும் சாதிக்கும் திராணியற்றுக் குடிப்பழக்கங்களுக்கு அடிமையாகிக் குற்றவாளிகளாக மாறும் தன்மை இவர்களிடம் அதிகமாகும். தான் வாழும் சமூகத்திற்கு எந்தவிதப் பங்களிப்பும் செலுத்த முயற்சிக்காத இவர்கள் சமூகம் தனக்கு உதவவேண்டும், தன்னில் அனுதாபப் படவேண்டும் என் அதிகமாக எதிர்பார்ப்பவர்கள். விதிகள், ஒழுங்குமுறைகள் சட்டங்கள் போன்றவை அடுத்தவர்கள் மதிப்பதற்காகவேயன்றி  அவற்றை மதிக்க வேண்டிய அவசியம் தமக்கில்லை என்பதை நியாயப்படுத்துபவர்கள். சமூகம் தன்னை ஏற்றுக்கொள்ளாதபோது அதற்காகக் கொதித்தெழும் இவர்கள் தமது கட்டுமீறிய நடத்தை காரணமாக மேலும் சமூகத்தால் ஒதுக்கப்படுகின்றனர். காலப்போக்கில் எட்டாப் பழம் புளிக்கும் என்ற கருத்துநிலைக்கு மாறும் இவர்கள் இதனால் மேலும் பாதிக்கப்பட்டு விரக்திநிலைக்கு மாறுகின்றனர்.

கோலங்களின் மூலங்கள்
கண்ணில் எதிர்ப்படுவோரைக் கேள்வி மேல் கேள்வியால் துளைத்தெடுக்கும் பருவம்  குழந்தைப்பருவம் என்பதைப் புரிந்து கொள்ளாது வாழ்க்கையைப் பற்றியோ நாட்டு நடப்புகளைப் பற்றியோ குழந்தையிடம் கருக்கொள்ளும்; வினவல்களைக் ஷகிழட்டுக்கதைஷ யாக்கிக் குழந்தைப்பருவத்தின் ஆராய்வூக்கத்துக்கு பூட்டுப் போடும் பத்தாம்பசலிப் பெற்றோருக்கு பிள்ளையாகப் பிறப்பவர்கள் அறிவு வளர்ச்சி தடைப்பட்ட மிகப்பெரும்; பாதிப்பானது வெளித்தெரியும் வாய்ப்பின்றி ஒன்றில் பெற்றோரைக் கனம் பண்ணும் ஷநல்லஷ பிள்ளைகள் என்ற தகுதிப் பத்திரத்துடன் வளர்ந்தோர் உலகிற்குள் நுழைந்துவிடுகின்றனர். அல்லது ஷ அப்படிச் செய்யாதே--- இப்படிச் செய்யாதே--- என்று போடும் கட்டுப்பாடுகளின் பயனை அவர்களையே திரும்ப அனுபவிக்கச் செய்யும் ஓர்மத்துடன் கட்டுப்படுத்த முடியாதவர்களாகத் தலையிடிக்குரியவர்களாக மாறுகின்றனர்.
பெற்றோர் அல்லது ஆசிரியர் விடும் தவறுகளை அவர்களுக்குச் சுட்டிக் காட்டுவதில் ஏற்படும் சுய திருப்தி, அடுத்தவர்களின் கவனத்தைத் தன்பால் திருப்பும் நோக்கில் முற்போக்கான கருத்தையோ அல்லது தீவிரமான கருத்தையோ முன் வைக்கும் தன்மை, தமது சகபாடிகள் முன்னே தனது தரத்தை உயர்த்தும் நோக்கில் கொம்புத் தேனைக் கொண்டு வருவேன் என்ற சூளுரைப்புகள்--- குழப்பன்காசிகளின் உருவாக்கத்துக்கு இப்படிப் பல காரணங்களைக் கூறமுடியும்
.
உடல் சார்ந்த அதீத வளர்ச்சியும் முதிர்ச்சியும், பாடசாலைச் சுழல்கள், வீட்டுச்; சுழல்கள்  பொதுசனத் தொடர்பு ஊடகங்களின் தாக்கங்கள் போன்றன மேற் கூறப்பட்ட நான்கு வகை குழப்பன்காசிகளின் உருவாக்கத்துக்கு மூல காரணங்களாகக் கொள்ளப்படுகின்றன எனினும் இதற்கு அதுதான் காரணம் என்று அறுதியிட்டுக் கூறமுடியாதவாறு அனைத்துக் காரணிகளும் ஒன்றுடன் ஒன்று பின்னிப் பிணைந்து காணப்படுவதானது இது தொடர்பான சமூகவியலாளர், உளவியலாளர் மானுடவியலாளர் போன்றோர் ஒன்றிணைந்து ஆய்வுகளை மேற்கொள்ளும் நிர்ப்பந்தத்தை ஏற்படுத்தியிருக்கிறது..

ஆட்டங்காணும் அத்திவாரம்
மனமுறிவுகள் எதிர்ப்புணர்வுகள் முதலில் வீட்டிலேயே கருக்கொள்கின்றன.
குழந்தையின் ஆராய்வூக்கத்துக்குக் காரண காரியத் தொடர்புடன் தீனி போடக்கூடிய, ஒரு செயற்பாட்டை ஏன், எப்படி, எங்கே, எப்போது, யார் செய்தால் நன்று என்பதில் தெளிவைத் தரக் கூடிய கருத்தியல்; முழுமை கிடைக்கும் வாய்ப்புள்ள குடும்பங்களில் வாழும் பிள்ளையிடம்  தன்னுணர்வை விடவும் சமூக உணர்வு மேலோங்கிச் சமூகத்தின் ஒவ்வாமைகளை விலக்கிக் கொள்வதற்கு ஆக்கபூர்வமாக ஏதாவது செய்யவேண்டும் என்று மனதில் ஏற்படும் உத்வேகம் அவர்களைச் சீர்திருத்தவாதியாக்குகின்றது.

குழந்தையின் கேள்விகளுக்குக் காரண காரியத் தொடர்புடன் பதில் சொல்லும் வகையில் தனது அறிவுத் தளத்தை மாற்றியமைக்கவோ அல்லது செப்பனிடவோ முயலாது தாம் பத்தாம் பசலிகள் இல்லை என்பதை மட்டும்  வெளிப்படுத்தும் ஒரே எண்ணத்துடன்; குழந்தையை அதன் போக்கில் விட்டு வளர்க்கும் நவீன மேலைத்தேய முறைகளின் சாதக பாதகங்களை விளங்கிக்கொள்ளாது கண்மூடித்தனமாக அவற்றை அட்சரம் பிசகாது அப்படியே கைக்கொள்வதன் மூலம் குழந்தையின் வினவல்களுக்கு பதில் சொல்லும் வகையற்று ஒன்றில் ஷதிருதிருஷவென்று முழிக்க அல்லது ஏதாவது சொல்லி மழுப்ப குழந்தை ஒன்றில் இவர்கள் மீது வைத்திருக்கும் மதிப்பைக் குறைக்கிறது. அல்லது இவர்களைவிட தனக்கு ஷகனக்கஷத் தெரியும் என்ற உயர்வு மனப்பாங்குக்குச் சென்று இவர்களைக் கண்டபடி கட்டுப்படுத்த விழைகிறது.

குழந்தையை அதன்போக்கில் விட்டு வளர்க்கும் மேலைத்தேய முறையைத் தவறாக விளங்கிக்கொண்டு தன்விருப்பப்படியே சாப்பிட, விளையாட, தூங்கப், படிக்க வசதி செய்து தரும் குடும்பங்களில் வாழும் பிள்ளை வீட்டுக்கு உள்ளே இருப்பது போன்று வீட்டுக்கு வெளியேயும் தன் விருப்பப்படி உலகத்தை வளைக்க முயல்கிறது. முயற்சி வீணாகும் போது கிளர்ச்சி செய்கிறது. கிளர்ச்சி பலனற்றதாக மாறும் நிலையில் விரக்தியடைந்து வீணாகிப் போகின்றது.

நேரில் பார்த்த வீதிச் சண்டையையோ அல்லது சினிமாப் படத்தின் அடிதடியையோ பிள்ளைகளுக்கெதிரே நியாயப்படுத்தும் பெற்றோருக்கு வன்முறையே வழி என்ற சிந்தையுள்ள பிள்ளை உருவாகுதல் தவிர்க்க முடியாததாகின்றது. ஷ அந்தக் காலத்தில் தமிழரசுக் கட்சிக் கூட்டங்களில் முன்வரிசையில் இருந்து---ஷ என்று அரசியல் கட்சிக் கூட்டங்களில் தான் ஈடுபட்டது பற்றி கதையாக அளக்கும் தகப்பனமார் மாணவர் போராட்டம் என்றவுடன் மட்டும் வீட்டுக்குள் தம்மைச் சிறைப்படுத்தும் மர்மம் என்ன என்று பிள்ளையிடம் இயல்பாக எழும் வினவல் தரும் எதிர்ப்புணர்வு ஆரம்பத்தில் முணுமுணுப்பாகத் தொடங்கி வாய்த்தர்க்கமாக நீளுகின்றது. பொய் சொல்லித் தன் காரியத்தைத் தொடரும் மனப்பாங்கை உருவாக்குகின்றது. கண்டதற்கெல்லாம் முதுகுத் Nதூல் உரிக்கும் தகப்பன் முன்னே தனது எதிர்ப்புணர்வைக் காட்டும் வலுவின்றிக் கூழைக் கும்புடு போட்டுவிட்டு தமக்கு இளைய சகோதரர்களைக் கண்டபடி நொருக்குதல் வீட்டுக்கு வெளியே சண்டித்தனம் செய்து பேரெடுத்தல் போன்ற செயற்பாடுகளுக்கு இட்டுச் செல்கிறது.

அனைத்தையும் மாற்றும் சகவாசம்
கூட்டாளிகள் என்று வரும் போது இப்பருவத்தினரின் பிரதான நோக்கம் தமது கூட்டாளிகளின் மத்தியில் தமக்கென அங்கீகாரம் ஒன்றைப் பெறும் வகையில் நடையுடை பாவனையில் மட்டுமன்றிக் கதை பேச்சிலும் மாற்றத்தை ஏற்படுத்துவது தான். கூட்டாளிகள் மத்தியில் நிரந்தர இருப்பை ஏற்படுத்தும் வல்லமை பொருளாதார வசதியில் அதிகம் தங்கியுள்ளது. அரச உத்தியோகம் பார்க்கும் தனது தோழனின் அப்பா போன்று இல்லாமல் தனது அப்பன் கூலித் தொழில் செய்பவராக அல்லது தோட்டம் செய்பவராக இருக்கிறாரே என்ற கவலை அடிக்கடி மனதை வாட்டும். வீட்டின் அமைப்புத் தொடக்கம் அதன் பரிமாணம் அது உள்ளடக்கும் தளபாடங்கள், அவற்றின் பெறுமதி, நேர்த்தி, ஒழுங்கமைப்பு, சமையலறை, குளியலறை வசதிகள் போன்றவை தொடர்பான அதிக சிரத்தை எல்லாப் பருவத்தினரையும் விட இவர்களுக்கே அதிகமாகும். தம்மிடம் உள்ள வசதிகள் ஒவ்வொன்றும் சகபாடிகள் வட்டத்தில் உள்ளவர்களின் வசதிகளுடன் ஒப்பிடப்பட்டு குறைகளே அதிக கவனத்தில் எடுக்கப்பட்டு இவற்றின் வெளிப்பாடுகள் சிணுங்கல்கள், முணுமுணுப்புகள், விரக்திகள் எனப் பல வடிவங்கள் எடுக்கின்றன.
மதிய உணவாகப் பிட்டும் முட்டைப் பொரியலும் சமைத்துக் கட்டிக் கொடுக்கக் கூடிய பொருளாதார வசதியும் சுவையாகச் சமைக்கும் அம்மாவும் இருந்தாலும் சக தோழி கொண்டு வரும் ஷசான்விச்ஷ மாதிரி அம்மாவுக்குச் செய்யத் தெரியவில்லையே என்ற ஏக்கம் முதலில் முகத்தைக் கோணலாக்கி வீட்டை அலங்கோலமாக்கி இறுதியில்; முழமையாக மனதைக் கோணலாக்கும். இதுவே மாறி சகதோழன் சாப்பாட்டுக்குக் கஷ்டப்படுவது பொறுக்காது தானும் மதிய உணவை ஒறுக்கும் தன்மையை வளர்க்கும்.

தலைமுறை இடைவெளி
இரண்டு தலைமுறைகளுக்கிடையில் மனப்பாங்கு தொடர்பாக ஏற்படும் வேறுபாடு அல்லது புரிந்துணர்வின்மையே தலைமுறை இடைவெளி எனப்படுகிறது. இன்னும் விரிவாகச் சொல்வதாயின் மனப்பாங்கு, நடத்தை போன்ற அம்சங்களில் வயதில் மூத்தோருக்கும் இளையோருக்கும் இடையில் ஏற்படுகின்ற கருத்து பேதங்கள், தர்க்கங்கள் போன்றவற்றின் வெளிப்பாடுகளைக் குறிப்பதற்கு இப் பதம் பயன்படுத்தப்படுகின்றது. பெற்றோருக்கும் குழந்தைகளுக்குமிடையிலான வயது வேறுபாட்டின் அடிப்படையிலேயே இத்தகைய பேதங்கள் உருவாகின்றது எனினும்; மரபு ரீதியான சமூகங்களில் வயதினடிப்படையிலான தலைமுறை இடைவெளியானது இன்றும் குறைவானதாகவே இனங்காணப்பட்டிருக்கிறது. 30 வயதுக்குப் பின்னர் தாய்மையடையும் கல்வி வாய்ப்பைப் பெற்ற நடுத்தர வர்க்கப் பெண்ணை விடவும் கல்வி பெறும் வாய்ப்பற்ற 15 வயதில் தாய்மையடையும் தொழிலாள வர்க்கப் பெண்ணுக்கும் அதன் குழந்தைக்குமிடையிலான வயது இடைவெளி சரிபாதி குறைவானதாகும். எனினும் நடுத்தரவர்க்கப் பெண் எதிர்கொள்ளும் தலைமுறை இடைவெளி சார்ந்த பாதிப்புக்களை அப் பெண் பெற்றுக் கொள்ளும் கல்வியறிவின் துணை கொண்டு குறைத்துக் கொள்ளும் வாய்ப்புண்டு. எனவே வயது அடிப்படையிலான தலைமுறை இடைவெளி பெரிய பாதிப்புக்களை ஏற்படுத்தாத போதும் வளரிளம் பருவத்தினர் தமது பெற்றோரை எதிர்ப்பதற்கான காரணம் எது என்பதை கண்டறிதல் முக்கியமானதொன்றாகும். இங்கு தான் பண்பாடு சார்ந்த தலைமுறை இடைவெளி என்ற கருத்துநிலையின் தோற்றப்பாட்டை  இனங் காணும் வாய்ப்பு எமக்கு உண்டாகிறது. எந்தவொரு சமூகத்திலும் தலைமுறைகளுக்கிடையிலுள்ள பதற்ற நிலையின் அளவு சமூக தொழினுட்ப வேகத்துடனும் சிக்கல் தன்மையுடனும் நெருங்கிய தொடர்புடையது.  அறிவியல் தொழினுட்ப மாற்றங்களினால் அண்மைக்காலங்களில் உலக சமூகங்களின்; முழு வாழ்க்கை வடிவங்களும் புதிய விழுமியங்கள் புதிய ஆர்வங்களுடன் துரித மாற்றங்களைச் சந்தித்துக் கொண்டிருப்பதே பண்பாடு சார் தலைமுறை இடைவெளி என்ற கருத்துநிலையின் தோற்றத்துக்கு பிரதான காரணமாகும். புலமைப் பரிசில்கள், புலம்பெயர் வாழ்வு போன்றவற்றின் காரணமாக வெளிநாடுகளில் உயர் கல்வி பெறும் வாய்ப்பு, பொது சனத் தொடர்பு ஊடகங்களின் உலகளாவிய பாவனை, மிகக் குறைந்த செலவுடன் கூடிய உலகச் சுற்றுலாக்கள் போன்றன பெற்றோரும் அவர்களது குழந்தைகளும் தத்தமது ஆர்வங்களையும் விழுமியங்களையும் ஒருவருக்கொருவர் புரிந்து கொள்ளும் தன்மையைச் சிக்கலாக்கி விட்டிருக்கின்றன.

பாதிப்புக் குறைந்தவர்கள்
நிலையான சமூகக் கட்டமைப்பும், இறுக்கமான விதிகளும் நிலை கொண்டிருக்கின்ற சாதாரண கிராமிய சமூகங்களில் உள்ள வளரிளம் பருவத்தினரைப் பொறுத்து இவர்கள் ஸ்ரான்லி ஹோல் குறிப்பிடுவது போன்று எந்தவொரு அமைதியற்ற சிக்கல் நிறைந்த காலகட்டம்ஜீநசழைன ழக ளவழசஅ யனெ ளவசநளளஸ எதனையும் எதிர் கொள்ளாமலேயே முதிர் பருவத்துக்குள் நுழைந்து விடுகின்றனர். இத்தகைய சமூகங்களில் தனிநபர் ஒருவரின் வாழ்க்கைப் பங்கும், அதன் தொடர்புத் தன்மைகளும் தெளிவாக வரையறைப் படுத்தப்படுவதுடன்  வாழ்க்கையானது ஒரு தலைமுறையிலிருந்து அடுத்த தலைமுறைக்கு ஒரு தொடர்புத் தன்மையுடனேயே நகர்கிறது. எனவே தலைமுறை இடைவெளி என்பது மிகவும் மட்டுப்படுத்தப்பட்டதொன்றாகவோ, பாதிப்பு தெளிவாக இனங்காணப்படாத தொன்றாகவோ தான் இருக்கிறது. எமது சமூகத்தைப் பொறுத்தவரைக்கும் கல்வி அறிவில் உலகின் வளர்ச்சியடைந்த சமூகங்களுக்கு இணையானதாகக் கருதப்படினும் கூட இறுக்கமான பண்பாட்டு விழுமியங்களால் அரண் செய்யப்பட்டிருக்கும் வாழ்க்கையமைப்புக் காரணமாக தலைமுறை இடைவெளி தொடர்பான தாக்கங்கள் மட்டுப்படுத்தப்பட்டதொன்றாகவே இனங்காணப்பட்டிருக்கின்றன. பெற்றோரின் தோற்றம், உரையாடும் பாங்கு, உணவு உட்கொள்ளும் போது கடைப்பிடிக்கப்படும் பழக்க வழக்கங்கள், ஒருவரையொருவர் உபசரிக்கும் விதம், சமூக விவகாரங்களில் பங்களிப்பு செய்யக்கூடிய ஆற்றலின்மை, தமது செயற்பாடுகளுக்கு அவர்கள் விதிக்கும் கட்டுப்பாடுகள் என்பன  மாற்றியமைக்கப்படவேண்டும் போன்ற விருப்பங்கள் இத்தகைய சமூகங்களில் தலைமுறை இடைவெளி தொடர்பாக ஏற்படும் தாக்கங்களில் சிலவாகும்.. குடும்ப ரீதியில் அழுக்கு வேட்டியும், நைந்த சால்வையுமாகத் தெருவோரத் திண்ணையில் அரட்டையடிக்கும் தகப்பனை அவமானமாகக் கருதுதல், தமது தோழர்களைச் சரியான வகையில் வரவேற்கத் தெரியாது திண்டாடும் தாயைச் சாடுதல,;  வெளிறிய, அழுக்கான ஆடைகளுடனும், கலைந்த தலையுடனும் திரியும் சகோதர்களைச் சாடுதல் , பாடசாலையில் ஆசிரியர்களின் கற்பித்தல் தொடர்பான திருப்தியின்மை  போன்ற சிறுசிறு எரிச்சல்கள், வாய்த் தர்க்கங்களுடன் தலைமுறை இடைவெளியின் தாக்கங்கள் மட்டுப்படுத்தப்பட்டுவிடுகின்றன. அழுக்காகத் திரியும் சகோதரர்களை இழுத்து வைத்துத் தலை வாரிவிடுதல், குளிப்பாட்டி விடுதல், அடிக்கடி வீட்டைக் கூட்டுதல், தளபாடங்களை அடிக்கடி இடம் மாற்றி வைத்தல், மத அனுட்டானங்கள்  தொடர்பான மாற்றங்களை அவாவி நிற்றல் போன்றவற்றை இவர்களிடம் காண முடியும்.

பரிதாபத்துக்குரியவர்கள்---
மாறாக, தொடர்ச்சியான முறையில் மாற்றங்களைச் சந்திக்கின்ற , உள்வாங்குகின்ற, சரிப்படுத்த விழைகின்ற,, திருத்தம் மேற்கொள்கின்ற நவீன சமூகங்கள்pல் தலைமுறை இடைவெளி மிக அதிகமானதாகும். உண்ணுதல், உறங்குதல், பொழுது போக்குதல்,; என்பவற்றுக்குக்கூட நேர அட்டவணை தயாரித்து அதன்படி வடிவமைக்கப்பட்ட வாழ்க்கை முறையில் பம்பரமாகச் சுழலும்; நகரமயமாக்க சமூகங்களில் வாழும் பெற்றோர்கள், உடன்பிறப்புகளின் கவனத்திலிருந்து பெரும்பாலும் விடுபட்டுப் போகும் வளரிளம்பருவத்தினர் தமக்கெனச் சொந்தமாக ஒரு சமூகத்தை உருவாக்கிக் கொள்ளும் போக்கும், இச் சமூகமானது வெறியெழுச்சி கொண்டதாக, தமக்கெனச் சொந்தமான கட்டமைப்பை, நியமங்களை, ஒழுங்குமுறைகளை, சடங்குகளை, தாம் பின்பற்றக்கூடிய குழுக்களை, தமக்கென ஒரு அந்தஸ்தை, தண்டனைகளை கொண்டதாக இருப்பதும் தவிர்க்கமுடியாததாகின்றது. மரபு ரீதியான சமூகங்களில் வறுமை, போசாக்கின்மை, கல்வியின்மை, சடங்கு சார்ந்த வன்முறைகள், குழந்தைத் திருமணம் போன்றவை வளரிளம் பருவத்தினரைப் பாதிப்பனவாக இருக்கும் அதேசமயம் நவீன சமூகங்களில் போதைப்பொருள் பாவனை, கொலை, கொள்ளை, முறைகேடான பாலுறவு போன்ற நெறிபிறழ் நடத்தைகள் போன்றவற்றுக்குள் இலகுவாக ஈர்க்கப்படுபவர்களாக இவர்கள்  மாறுகின்றனர்.. பெற்றோருக்கும் பிள்ளைகளுக்குமிடையிலான இடைவெளியானது எதிர்ப்புணர்வாகத் தோற்றங் கொள்கிறது. சொல்லாமல் கொள்ளாமல் தாம் நினைத்தபடி வீட்டை விட்டு; வெளியேறுதல்;, வீட்டுக்குத் திரும்புதல், சகோதரர்களுடன் கடுமையான வாய்த் தர்க்கங்களில் ஈடுபடுதல், கண்டபடி கூச்சலிடுதல், பொருட்களை வேண்டுமென்றே உடைத்தல், உறவினர்களுடன் கடுமையாக நடத்தல் போன்ற அசாதாரண நடத்தைக்கோலங்களிலிருந்து படிப்படியாகத் தொடங்கும் நெறி பிறழ் நடத்தையானது சில சமயம் தாக்குதல் , கொலை, கொள்ளை, பாலியல் துஷ்பிரயோகம், பாலியல் வல்லுறவு போன்ற தண்டனைக்குரிய குற்றங்களில் ஈடுபட்டுச் சிறை செல்லும் நிலைமைக்கும் இட்டுச் செல்கிறது. வளரிளம் பருவத்தின் ஆரம்பக் கட்டத்தினரான 13-14 வயதுக்குரியோர் களவு, கொள்ளை, ஏமாற்றுதல் போன்ற சொத்துக்களுக்கெதிரான வன்முறையில் ஈடுபடும் அதே சமயம் முடிவுக் கட்டத்துக்குரியவர்கள் பாலியல் வல்லுறவு, பாலியல் ஒழுங்கீனங்கள், தற்கொலை முயற்சி போன்ற மனிதர்;களுக்கெதிரான வன்முறையில் ஈடுபடுகின்றனர். ஆண்களைப் பொறுத்து இத்தகைய குற்றங்கள் களவு, ஒழுங்கற்ற நடத்தை, கொள்ளை, சொத்துகளை அழித்தல், போக்குவரத்து விதிகளை மீறுதல், போதைப்பொருள் பாவனை, மனிதர்களுக்கு தீங்கு விளைவித்தல் போன்றவையாக இருக்கும் அதேசமயம் பாலியல் ஒழுங்கீனங்கள் , வீட்டை விட்டு ஓடுதல், சிறு சிறு களவுகள், சீர் கேடுகள் போன்றவை பெண்கள் சார்ந்த குற்றங்களாகக் கருதப்படுகின்றன.

விடலைகள் என்னும் விசித்திர உலகில் - 2

உணர்ச்சிக் கடல்கள்
மனித சாதனைகளுக்கெல்லாம் அடிப்படையானது அறிவுத் திறன்களல்ல. மனவெழுச்சிகளே என்பதை நாம் எமது நடைமுறை அனுபவங்களில் கண்டு கொள்கின்றோம். மகிழ்ச்சி, அன்பு, பாசம், ஆர்வம் போன்ற மகிழ்வூட்டும் மனவெழுச்சிகளும், கோபம், விரக்தி, கவலை போன்ற வெறுப்பூட்டும் மனவெழுச்சிகளும் மனித வளர்ச்சிக்கட்டங்கள் அனைத்திலும் இடம் பெறுவதெனினும் இவை முழுமையாக ஆக்கிரமித்து நிற்கும் பருவம் வளரிளம் பருவம் என்றே இனங்காணப்பட்டிருக்கின்றது. வளரிளம் பருவத்தினரை ஷமனவெழுச்சிகளின் சங்கமம்ஷ என்று அழைக்கலாம்;. இப்பருவத்தில் அதிகமாக ஏற்படும் உடல் மாற்றங்களே மனவெழுச்சிகளுக்குக் காரணமென்று ஆரம்ப கால ஆய்வுகள் முடிவுக்கு வந்திருந்தன. உடல் வளர்ச்சியானது குழந்தைப்பருவம் முதற் கொண்டே நிகழ்ந்தாலும் கூட வளரிளம் பருவத்தில் உடல் வளர்ச்சியானது மிகத் தீவிரமடைகின்றது. நாளாந்தம் உடலில் மாற்றங்கள் நிகழ்ந்தவண்ணமே இருக்கும். வெளி உறுப்புகள் மட்டுமன்றி இதயம், குடல், சுவாசப்பை போன்ற உள்ளுறுப்புகளும் இப் பருவத்தில் தீவிர வளர்ச்சியடைகின்றன. குறிப்பாகப் பாலுறுப்புகளின் வளர்ச்சியானது அச்சத்தையும் கவலையையும் ஏற்படுத்தி விரும்பத்தகாத மனவெழுச்சிகளை ஏற்படுத்தவல்லது எனக் காரணங் கூறப்பட்டது. இதனடிப்படையில் 20ம் நூற்றாண்டின் தொடக்கத்தில் உடல் மாற்றத்தின் அடிப்படையில்  வளரிளம்பருவமானது அமைதியற்ற சிக்கல் நிறைந்த பருவமாக[Period of Storm and stress] ஸ்ரான்லி ஹோல் என்பவரால் அடையாளங் காணப்பட்டது.  ஆனால் மனிதன் என்பவன் உடல் உள்ளம் என்ற இரு கூறுகளும் நெருங்கி இசைந்து இயங்கும் உயிரி என்பதும் இவ்விரு கூறுகளும் ஒன்றையொன்று சார்ந்து இயங்குபவை என்பதும் உடலில் ஏற்படும் களைப்பு சிந்தனையைப் பாதிப்பது போன்று உளப் போராட்டங்கள் மனிதனது உடல்நிலையை வெகுவாகப் பாதிக்கும் என்பதும் அனுபவத்தில் காணும் உண்மையாகும். எனவே உடல் மாற்றங்களுக்கு மட்டுமன்றி உள மாற்றங்களுக்கும் அடிப்படையாக இருக்கும் நாளமில் சுரப்பிகளே Endoctrine glands  மனவெழுச்சிகளுக்குக் காரணமென அண்மைக்கால மருத்துவ ஆய்வகள் கண்டுபிடித்திருக்கின்றன. இச்சுரப்பிகள் சுரக்கும் ஹோர்மோன் என்னும் சுரப்பு நீரானது இரத்த ஓட்டத்தில் கலந்து உடலெங்கும் பரவி உடலின் அனைத்துப் பிரிவுகளின் தொழிற்பாட்டைப் பாதிக்கின்றது. ஒரு தொகுதியாகச் சுரக்கப்படும் இச் சுரப்பிகள் தனது அளவிலிருந்து கூடியோ அல்லது குறைவாகவோ சுரக்குமாயின் உடல், உளச் சமநிலை பாதிக்கப்படும். இதனடிப்படையில் 1970ல் நியூயோர்க் சஞ்சிகையில் வெளியிடப்பட்டE.Nemy
என்பவரின் ஆய்வு முயற்சியானது  அமைதியற்ற சிக்கல் நிறைந்த பருவத்தை 'தீவிர மனவெழுச்சிப்' பருவமாக [Period of heightened emotionality]  மாற்றிவிட்டிருக்கின்றது.

மன உணர்ச்சிகளும் மனவெழுச்சிகளும் [Feelings & Emotions]

மனவெழுச்சிகளைச் சாதாரணமாக நாம் அனுபவிக்கும் மனவுணர்ச்சிகளுடன் குழப்பிக் கொள்ளக் கூடாது. மனவுணர்ச்சிகள் சாதாரண நேரங்களில் ஏற்படுபவை. மனவெழுச்சிகளோ நெருக்கடி நிலைகளில் தோன்றுபவை. மனவுணர்ச்சிகள் மேலோங்கி நிற்கும் ஒரு நிலையே மனவெழுச்சியாகும். இது நேர்க்கணிய, எதிர்க்கணிய விளைவுகளை ஏற்படுத்தவல்லது. செயற்பாடொன்று சிலரால் பாராட்டப்படும் போது செயற்பாட்டை மேற்கொண்டவருக்கு ஏற்படுவது மகிழ்ச்சி என்ற மனவுணர்வு. இது சட்டெனத் தோன்றி மறையலாம். அல்லது சில காலமாவது மகிழ்ச்சியுணர்வைத் தக்கவைத்து உடல் ரீதியான சுறுசுறுப்பை ஏற்படுத்தலாம். இதுவே தன்னால் நேசிக்கப்படும் ஒருவரின் பாராட்டுதலாக இருக்கும்போது அது மனவெழுச்சியாக மாறி மேலும் மேலும் பாராட்டைத் தேடும் செயற்பாடுகளைச் செய்யத் தூண்டும்.  இயல்பிலேயே நன்கு எழுதக்கூடிய திறன் உள்ள பெண் ஒருவரிடம் 'அம்மா கதை சுப்பர்' என்ற பாராட்டு மகிழ்ச்சி என்ற மனவுணர்ச்சியைப் பெரிதாகத் தோற்றுவிப்பதில்லை. மாறாக, சின்னச் சின்னக் கதைகளில் கவனம் செலுத்தும்; வளரிளம் பருவத்து மகளின் கதை ஒன்றை வீட்டிலுள்ளோர் பாராட்டும் போது அது மகிழ்ச்சி என்ற மனவுணர்ச்சியைத் தோற்றுவிக்கின்றது. இதுவே சகபாடிகள் மத்தியில் அவரது கதைகள் பாராட்டப்படும் போது மேலும் மேலும்  புதிய புதிய கதைகளை எழுதத் தூண்டும்; மனவெழுச்சியை அது தோற்றுவிக்கின்றது.  இந்த மனவெழுச்சியானது எழுத்துத் துறையில்; புதுப்புது உத்திகளை கையாளும் ஆவலைத் தூண்டுவதுடன் சில சமயங்களில் எழுத்துத் துறை தொடர்பான புதிய ஆய்வுகளைக் கூட இச் சமூகத்துக்கு விட்டுச் செல்லும் அளவுக்கு உள ரீதியான மாற்றங்களை ஏற்படுத்தவல்லது. இதிலிருந்து நாம் புரிந்து கொள்ளக் கூடியது மனவுணர்ச்சிகள் சட்டெனத் தோன்றி மறைபவை. உடல் உள மாற்றங்களை அவை ஏற்படுத்துவதில்லை. மனவெழுச்சிகள் அப்படிப்பட்டவையல்ல அவை உடல் ரீதியாக மட்டுமன்றி உள மாற்றங்களையும் ஏற்படுத்தவல்லவை. ஒருவரின் மரணச் செய்தியைக் கேட்டவுடன் ஏற்படக் கூடிய கண்ணீர் வெளிப்பாடு துக்கம் என்ற மனவுணர்ச்சியின் வெளிப்பாடே. இதுவே மயக்க நிலையை ஏற்படுத்தவல்லதாயின் அது மனவெழுச்சியின் பாற்பட்டதே. உடல் நடுக்கம் அல்லது மயக்கம் என்பது உடல்நிலைப்பட்டதாகவும், சாப்பாட்டை வெறுத்தல், விட்டத்தை வெறித்து நோக்குதல் போன்ற செயற்பாடுகள் உளநிலைப்பட்டதாகவும் இருக்கும். மனவெழுச்சிகள் சில சமயம் மிகவும் தீவிரமடைந்து மனவெழுச்சிப் போராட்டமாகவும் மாறுவதுண்டு.

காரணம் இது தான்
பூப்படைதலுடன் ஒரு குழந்தையின் குழந்தைப் பருவம் முடிவுக்கு வந்து விடுகின்றது. வயதுக்கு வருதல், பக்குவப் படுதல், பெரிய மனுசியாதல் போன்ற வார்த்தைப் பிரயோகங்கள் வெறும் உடல் மாற்றத்தை மட்டுமே கருத்தில் எடுக்கின்றன.  அதன் உள ரீதியான மாற்றம் பற்றி யாருமே சிந்திப்பது கிடையாது. உடல் மாறினால் உள்ளமும் மாறிவிடும் தானே என்று பெரியோர்கள் எண்ணி விடுகின்றனர். குழந்தைகள் உலகுக்கென்றே தனித்துவமான உளப்பாங்கில் மாற்றம் எதுவுமின்றியே வளரிளம்பருவ உலகுக்குள் பிரவேசிக்கும் குழந்தை ஷசூழலுக்குத் தன்னைச் சரி செய்து கொள்ளாத எதுவுமே நிலைப்பதில்லைஷ என்ற இயற்கையின் நியதிக்கமைய அவ்வுலகுடன் பொருத்தப்பாட்டைப் பேண வேண்டிய நிலையிலுள்ளது. ஷபெரிய மனுஷிஷ அல்லது மனுஷன் என்ற தனது புதிய பதவிக்குத் தயாராகாத எந்தக் குழந்தையும் வழக்கத்துக்கு மாறான உணர்வை அனுபவிப்பது தவிர்க்க முடியாதது. வளர்ந்தோருக்குரிய உடலமைப்பைப் பெற்ற கையுடனேயே அவர்களைப்போன்றே நடத்தையும் இருக்க வேண்டும் என்ற சமூகததின் எதிர்பார்ப்பும் அந்த எதிர்பார்ப்பைப் பூர்த்தி செய்வதற்கான தொடர்ச்சியான அழுத்தமும் கவலை விரக்தி போன்ற அழுத்தமிக்க மனவெழச்சிகளை அல்லது கோபம் போன்ற அமைதியற்ற மனவெழுச்சியைத் தரக் கூடியது. குழந்தைப் பருவ விருப்பங்கள் பொதுவாக யதார்த்தத்துக்கு ஒவ்வாதவை. இந்த விருப்பங்களை வளரிளம் பருவத்தினர் அடையத் தவறும்போது அது அவர்களிடம் விரக்தி நிலையைத் தோற்றுவிப்பது தவிர்க்க முடியாதது. பொது இடங்களில் எவ்வாறு நடந்து கொள்வது, எவ்வாறு பேசுவது, எதிர்ப்பாலாரின் முன்னிலையில் எவ்வாறு பிரபல்யமாவது போன்ற சிந்தனைகள் பெரும்பாலும் மனவெழச்சியைத் தோற்றுவிப்பவை.

மகிழ்வூட்டும் மனவெழுச்சிகள் 
தனது உடலுறுப்புகளில் ஏற்படும் மாற்றங்களைத் துடிப்புடன் அவதானிக்கச் செய்வது ஆர்வம் என்ற மனவெழுச்;சியே. ஒருசிலரே பாலியல் தொடர்பான முழு அறிவுடன் வளரிளம் பருவத்துக்குள் பிரவேசிக்கின்றனர். பாலியல் அறிவு  நடைமுறை வாழ்வின் ஒரு அங்கமாக அங்கீகரிக்கப்பட்ட வளர்ச்சியடைந்த மேலைத்தேய நாடுகளில் வளரிளம் பருவத்தின் தேடல் அறிவியல் கண்டுபிடிப்புகள், உலக விவகாரங்களில் அக்கறை போன்றவற்றில் அதிகம் திசைதிருப்பப்படுவதாக இருக்க கலாச்சார விழுமியங்களை இறுக்கமாகப் பேணும் கீழைத்தேய சமூகங்களில் வளரிளம்பருவம் முழுமையும் சிலசமயம்  அதற்குமப்பால் சென்று திருமணம் முடிக்கும் வரை பாலியல் தொடர்பான தேடல் தொடருகின்றது.
உடல் நலம், சுய திருப்தி, தான் வாழும் சூழலுடன் சரிவரப் பொருந்தி நிற்கும் தன்மை, தனது செயற்பாடுகளில் தான் அடையும் வெற்றி காரணமாகத் தனக்குள் உருவாகும் உயர் உணர்ச்சி. மன உளைவுச் சூழலில் ஏற்படக் கூடிய நகைச்சுவை உண்ச்சி,  போன்றன மகிழ்ச்சி என்ற உயர்நிலை மனவெழுச்சிக்கு அடிப்படையாகும்.

பாசம் என்பது மகிழ்வூட்டும் மனவெழுச்சி. தாயிடம் ஆரம்பித்து,  குடும்ப உறுப்பினர்கள், விளையாட்டுப் பொருட்கள,; செல்லப் பிராணிகள் என குடும்பம் என்ற வட்டத்துக்குள்ளேயே கழியும் குழந்தைப் பருவப் பாசம் வளரிளம் பருவத்தில் குடும்பத்தை விட்டு வெளியேறி மிக அதிகளவில் சகபாடிகளுடனும்  சிறு அளவில் செல்லப் பிராணிகளுடனும் மட்டுப்படுத்தப்பட்டுவிடுகின்றது.  அதுமட்டுமன்றி வளரிளம் பருவத்தில் பாசத்தின் தீவிரத்தன்மையை இனங்காண முடியும். பாசத்தையும் அன்பையும் ஒன்றெனக் குழப்பிக் கொள்வோரும் உண்டு. இரண்டுக்கும் வேறுபாடு உண்டு. பாசத்தின் உச்சக்கட்டமே அன்பாகப் பரிணமிக்கின்றது. அன்பு என்பது பாசத்தை விடத் தீவிரமிக்கது. பொதுவாக எதிர்பாலாரிடம் ஏற்படுவது. பாலியல் விருப்பத்தின் கூறுகளைத் தன்னகத்தே கொண்டது. பாசம் அப்படிப்பட்டதல்ல. இது தீவிரத் தன்மையற்றது. எதிர்ப்பாலாரிடம் ஏற்படுவதென்றாலும் கூட பாலியல் விருப்பத்தின் கூறுகளை இது உள்ளடக்குவதில்லை. ஓரினப் பாலாரிடம் மட்டுமன்றி எதிர்பாலாரிடமும் இது தோற்றம் பெறும்;.

வெறுப்பூட்டும் மனவெழுச்சிகள்
பாம்புகள் பல்லி, கரப்பான் பூச்சி போன்ற உயிரிகள்;, சகபாடிகள் முன்னே நல்ல பேர் எடுக்க வேண்டும் என்ற உணர்வு,  இயலாமை, போன்றவை அச்சம் என்ற மனவெழுச்சியைத் தோற்றுவிப்பவை. தன்னால் நேசிக்கப்படுவோரின் முன் தனது அந்தஸ்து, பாதுகாப்பு போன்றவை அச்சுறுத்தலுக்குட்படும் என்ற அச்ச உணர்வு பொறாமையாக உருக் கொள்ளும். அதிக வயது இடைவெளி விட்டும் பிறக்கும் பிள்ளைகளில் மூத்த பிள்ளையிடம் பொறாமையுணர்வு அதிகம் நிரம்பிக் கிடக்கும்.

மற்றவர்களால் பரிகசிக்கப்படல், முறைகேடாக நடத்தப்படல், குத்தல் கதைகளை கேட்டல், தனக்குரிய பொருளை தனக்கிளையோர் களவெடுத்தல், பொய் சொல்லுதல், அதிகாரம் செய்தல், தான் நினைத்தபடி காரியங்கள் நடவாதிருத்தல் போன்றன கோபம் என்ற மனவெழுச்சியைத் தோற்றுவிக்கும். எரிச்சலுணர்வும் விரக்தியும் கோபத்தின் இரு வேறுபட்ட வடிவங்களே. அடுத்தவரது பேச்சு, நடத்தை, பழக்க வழக்கங்கள் மாற்றியமைக்கப்பட வேண்டும் என்ற உணர்வு எரிச்சலுணர்வைத் தோற்றுவிக்கவல்லது. அது போல் குறிப்பிட்ட நாளில் நடைபெறத் திட்டமிடப்பட்ட ஒரு நிகழ்ச்சி இறுதி நேரத்தில் கைவிடப்படல், நாள் முழுவதும் செலவழித்துத் திருத்தப்பட்ட பொருள் திடீரெனக் கைதவறி விழுந்து விரயமாதல் போன்றவையும் எரிச்சலுணர்வைத் தோற்றுவிக்கவல்லது. பொதுவாக இது சமூகச் சூழலை மையப்படுத்தி எழுவது. ஆனால் விரக்தி உணர்வானது தன்னை மையப்படுத்தி எழுவது. உடல் அமைப்பு  தனக்கு சரிவரப் பொருந்தியிருக்கவில்லை, எதிர்ப்பாலாரை ஈர்க்கக் கூடிய வகையில் தான் கவர்ச்சியாக இல்லை, சக தோழருடன் ஆடிப்பாடும் அளவுக்கு தனது உடல் ஆரோக்கியமாக இல்லை, தனது நண்பர்கள் போல் செலவழிப்பதற்கு பணம் இல்லை, தனது விருப்பத்திற்கமைய படிக்கும் ஆற்றல் தனக்கு இல்லை என்ற உணர்வு விரக்தி என்ற மனவெழுச்சிக்கு அடிப்படையாகும். தான் நேசிப்போரின் மரணம், மண முறிவு, நீண்ட நாள் பிரிவு, உயிர் நண்பருடனான மன முறிவு, செல்லப் பிராணியின் மரணம் அல்லது மறைவு போன்றன துக்கம் என்ற மனவெழுச்சியைத் தோற்றுவிக்கக்கூடியது.

விடலைகள் என்னும் விசித்திர உலகில்-1

புதிய கண்டுபிடிப்பு
வளரிளம் பருவம் - இருபதாம் நூற்றாண்டின் இணையற்ற கண்டுபிடிப்புகளில் ஒன்று. முதிர்ச்சிநிலை நோக்கி வளர்தல் என்னும் பொருள் கொண்ட Adolescence என்னும் இலத்தீன் மொழிச் சொல்லே தமிழில் வளரிளம் பருவம் எனக் குறிக்கப்படுகிறது. கட்டிளம் பருவம், குமரப் பருவம், விடலைப் பருவம், காளைப் பருவம் முதலிய பலதரப்பட்ட பெயர்களால்  இது அழைக்கப்படுகிறது. 12-18 வயதுக்கிடைப்படடோர் வளரிளம் பருவத்தினர் என அடையாளப்படுத்தப்படினும் இப்பருவம் எப்போது தொடங்குகின்றது என்பதையோ எப்போது முடிகின்றது  என்பதையோ அறுதியிட்டுக் கூற முடியாது. காலநிலை, மரபு நிலை, குடும்ப நிலை, பொருளாதார நிலை, பால், தனிப்பட்ட பண்புகள், கிடைக்கக்கூடிய வாய்ப்புகள் என்பவற்றுக்கேற்ப இது மாறுபடும். உடலியல் மாற்றங்களை வைத்து வளரிளம் பருவத்தின் தொடக்கத்தைக் கணிப்பதில் ஓரளவு வெற்றியடைந்தாலும் கூட கலாச்சாரம், சமூக வகுப்புகள், தனிநபரின் தன்மை என்பவற்றைப் பொறுத்து இதன் முடிவை சரியாக கணிப்பிட முடியாதுள்ளது.

வளந்தோர் பருவத்திலிருந்து குழந்தைப் பருவத்தை வேறுபடுத்திக் காட்டும் அபிவிருத்திக் கட்டமாகவும் இப்பருவத்தைக் கருத முடியும். பிள்ளைப் பருவத்திலுள்ள குழந்தை உடல் ரீதியாகவும் உள ரீதியாகவும் வளர்ந்தோர் பருவத்தை நோக்கி வளர்ச்சியடைகின்ற ஒரு நிலை மாறல் கட்டமாகவே [period of transition]  இதனைக் கருத முடியும்.  வளந்தோராகவுமின்றி குழந்தைகளாகவுமின்றி இரண்டும் கெட்டான் நிலையில் இருப்பவர்கள் இவர்களே. பெண்பாலாரைப் பொறுத்து மார்பக வளர்ச்சி, பெண் உறுப்புப் பிரதேசத்தில் மாறுதல், மாதவிலக்கின் தொடக்கம் போன்றவையும், ஆண்பாலாரைப் பொறுத்து உரோமங்களின் வளர்ச்சி, குரல் மாற்றம், சிறுநீருடன் விந்து வெளிப்படும் காலம் போன்றவையும் இவர்கள் வளரிளம் பருவத்துக்குள் நுழைந்து விட்டார்கள் என்பதை உணர.;த்;தும் உடலியல் மாற்றங்களாகக் கருதப்படுகின்றன. எனினும் வெறுமனே உடலியல் மாற்றங்கள் மட்டும் வளரிளம் பருவத்தை வெளிப்படுத்த போதுமானதல்ல. தோற்ற மாற்றம் மட்டுமன்றி நடத்தை மாற்றங்களும் வளரிளம் பருவத்தைத் தெளிவாக வெளிக்காட்ட உதவுபவை.

உலக சனத் தொகையில் ஐந்தில் ஒரு பகுதிக்கு அதிகமானவர்கள் 10-19 வயதுக்கிடைப்பட்ட பதின் வயதினரான Teen age வளரிளம் பருவத்தினரே என ஐ.நாவின் சனத்தொகைப் பிரிவு குறிப்பிடுகிறது. இதில் கவலைக்குரிய விடயம் எதுவெனில் வளரிளம் பருவத்தினரில் 85 வீதமானோர் ஆயுட்காலம் மிகக் குறைவாக உள்ள வளர்முக நாடுகளிலே வாழ்வது தான். அதிலும் பெரும்பாலான ஆபிரிக்க நாடுகளின் மொத்தச் சனத்தொகையில் 50 வீதத்துக்கு மேற்பட்டோர் வளரிளம் பருவத்தினரே. ஐக்கிய நாடுகள் சிறுவர் நிதியத்தின் சிறுவர்க்கான சமவாயம் 18 வயதுக்குட்பட்டோர் அனைவரையும் சிறுவர் என வரைவிலக்கணப்படுத்தினும் கூட உலக மொத்த சிறுவர்களில் மூன்றிலொரு பகுதியைத் தமதாக்கிக் கொண்டுள்ள வளரிளம் பருவத்தினர்; தொடர்பாக அதிக கவனம் செலுத்தவில்லை என்றே கூறமுடியும்.

விடுபட்டது இவ்வாறு தான் !
கைத்தொழில் சமூகத்தின் வளர்ச்சி காரணமாக வெளித்தெரிய வந்த  மனித வளர்ச்சிக் கட்டமாகவே வளரிளம் பருவம் கருதப்படுகிறது. அதுவரை இப்பருவத்தினர் வளந்தோராகக் கருதப்பட்டு பொறுப்புமிக்க பணிகளில் வலிந்து ஈடுபடுத்தப்பட்டனர் நிலவுடமைச் சமூகம் ஒன்றில் முதிர்ச்சி நிலையானது  maturity பாலின முதிர்ச்சியின் தொடக்க காலமாகக் கருதப்படுகின்ற பூப்புப் பருவத்திலேயே ஆரம்பித்து விடுகிறது. ஆணாயின் குடும்பச் சுமையில் பங்கெடுக்கும் பொருட்டு உழைப்பில் ஈடுபடுதல் அல்லது குடும்பச் சுமையை தனித்து நின்று தாங்குதல், தன் தேவையைத் தானே தனித்து நின்று பூர்த்தி செய்தல், பெண்ணாயின் கரு வளத்துக்கு தயாரான கையுடனேயே தாய்மைப் பொறுப்பை வலிந்து திணித்தல் போன்றவை மூலம் இவர்கள் வளர்ந்தோராகவே கணிக்கப்பட்டனர். 19ம் நூற்றாண்டின் பிற் பகுதியில் நவீன கைத்தொழில் சமூகமும், சமூக நிலைமைகளும் உருவாக்கிய சமூக பொருளாதார மாற்றங்கள் உழைப்புச் சக்தியில் வளரிளம்பருவத்தினரின் தேவையைக் கணிசமானளவுக்கு இல்லாமல் செய்து விட்டது. நிலவுடமைச் சமூகத்தில் வீட்டுக்குள் சிறைப்பட்டிருந்த உடல் உள வளர்ச்சி பெற்ற பெண்களை பெண் விடுதலை என்ற பெயரில் முதலாளித்துவம் வெளியே கொண்டு வந்து குறைந்த கூலியில் உழைப்புச் சக்தியில் இணைத்த போது அதுவரை உழைப்புப் படையில் இருந்த உடல் உள முதிர்ச்சியற்ற ஒரு பருவத்தினரின் தேவை குறைவடைந்ததில் ஆச்சரியப்படுவதற்கு எதுவுமில்லை. வளர்ந்தோரின் வேலையில் பங்கு கொள்ளவும் முடியாமல் தமது இளைய சகோதரர்களுடன் இணைந்து குழந்தைப் பருவத்தின் மகிழ்ச்சியை அனுபவிப்பதற்கான வாய்ப்புகளுமின்றி இரண்டும் கெட்டான் நிலையில் விடப்பட்ட இப் பருவத்தினர்  மனித வளர்ச்சி கட்டத்தின் மிக முக்கியமான அங்கமாக வெளித்தெரிய ஆரம்பித்தனர். சமூகத்தின் உருவாக்கமாக கருதப்படும் வளரிளம் பருவமானது அமெரிக்காவின் குழந்தைக் கல்வியின் தந்தை எனக் கருதப்படும் ஸ்ரான்லி ஹோல் [Stanley Hall]   என்பவரின் கண்டுபிடிப்பாக 1904ம் ஆண்டு அவர் எழுதிய நூல் வாயிலாக கருதப்படுகிறது. வளரிளம் பருவத்தை தனிநபர் ஆளுமையின் புதிய பிறப்பாகவே கருதும் இவர் ஓர் அமைதியற்ற சிக்கல் நிறைந்த பருவமாகவே இப்பருவத்தை வரையறைப்படுத்துகின்றார். மனித வளர்ச்சிக் கட்டங்களின் ஒவ்வொரு நிலையிலும் சிக்கல்கள் தோன்றுமெனினும் வளரிளம் பருவத்து சிக்கல்கள் தனித்துவமானவை. இவர்களுக்கென்றே தனித்துவமாக அமைந்த உடற் பண்புகள், மனவெழுச்சிகள், சமூகப் பண்புகள், ஒழுக்கப் பண்புகள் போன்றவை இவர்களை ஏனைய பருவத்தினரிடமிருந்து வேறுபடுத்திக் காட்டுகின்றன.. இவற்றில் சிலவற்றை இங்கு நோக்குதல் பொருத்தமானது.

முதற்பார்வையே முழுப்பார்வை
முதற் பார்வையிலேயே தன்னைப் பற்றி அடுத்தவர்கள் போடும் கணிப்பே மிகப் பிரதானமானது என்பதையும் இந்தக் கணிப்பைத் தீர்மானிப்பதில் தோற்ற அமைவு மிக முக்கிய பங்கு வகிக்கின்றது என்பதையும் நன்கு அறிந்தவர்களாக இவர்கள் இருக்கின்றனர். ஆண்களை விடவும் பெண் பிள்ளைகளே தோற்ற அமைவு தொடர்பாக அதிக கவனம் செலுத்துகின்றனர். வளரிளம் பருவத்தை அதிகம் ஆக்கிரமிக்கும் ஒரு பொருள் கண்ணாடி. இவர்களுக்குப் பயன்படும் அளவுக்கு இது வேறு எந்தப் பருவத்தினருக்கும் பயன்படுவதில்லை. ஒரு ரூபா நாணயத்தின் அளவுள்ள கண்ணாடியே இவர்களின் அதிக பட்சத் தேவையைப் பூர்த்தி செய்துவிடும் வல்லமை கொண்டது. ஆண்கள் கூடுதலாக உடலமைப்பில் கவனம் செலுத்த, பெண்களைப் பொறுத்து முக அழகும் தலைமுடியும் கூடுதல் கவனம் பெறுகின்றது.  தோற்ற அமைவில் பிரதானமாகக் கவனத்தில் கொள்ளப்படுவது உடலமைப்பின் அளவும் வடிவமுமாகும். பொதுசனத் தொடர்பு ஊடகங்கள் உடலமைப்பின் அளவையும் வடிவத்தையும் தீர்மானிப்பதில் பெரும் பங்கு வகிக்கின்றன. ஆண்களைப் பொறுத்து தசை நார்களை விரிவடையச் செய்து ஆண்மைத் தோற்றத்தை ஏற்படுத்தக் கூடிய கொழுப்பு உணவுகளை அவர்கள் விரும்புகின்றனர். முக்கோண வடிவ உடலமைப்பு இல்லாவிட்டாலும் கூட சளைக்காது தோளுக்கு தடித்த உட்பட்டி வைத்து மேலாடையை அணிவதன் மூலம் வெளிப் பார்வைக்கு அத்தகையதொரு தோற்றத்தை ஏற்படுத்துவதில் தீவிர கவனம் உள்ளவர்களாகவே இவர்கள் இருக்கின்றனர் பெண்களைப் பொறுத்து மெல்லிய உடல்வாகைப் பெற அவர்கள் ஆலாய்ப் பறக்கின்றனர். உடலமைப்பைத் தீர்மானிப்பதில் பரம்பரை அலகுக்கு பெரும் பங்கு உண்டு என்பதைப் பெரும்பாலானோர் அறிவதில்லை அல்லது ஏற்றுக்கொள்வதில்லை. நகர்ப்புற சமூகங்களில் உடற்பயிற்சி, சம விகித உணவு போன்ற வழிமுறைகளைப் பயனபடுத்தி தமது உடலைக் கட்டாக வைத்திருக்கும் முயற்சி ஒரளவுக்கேனும் வெற்றி பெற்றிருக்கிறது. மாறாக கிராமிய சமூகங்களில் உணவைக் குறைத்தால்; உடலை வாட்டலாம் என்ற தவறான கணிப்பினால்  கட்டாய பட்டினி கிடப்போரும் பட்டினியின் பின்னர் உடலைப் பெருக்க உதவும் மாப்பொருள் உணவின் அதிக பயன்பாடும் உடல் கட்டமைவுக்கு உதவி செய்வதற்கு பதில் உடல் பெருக்கவே உதவுகின்றன. மாப்பொருளை நீக்கி நார்ப்பொருள் உணவை வேண்டியளவு சேர்த்து வயிறு நிறைய உண்பதுடன் உடலையும் கட்டுக்குள் வைத்திருக்கலாம் என்பதை இவர்கள் அறிவதற்கான வாய்ப்புகள் இல்லை.

முடியின்றி முடிவேது
ஆண்களைப் பொறுத்து அண்மைக்காலங்களில் தலை முடி அதிக கவனத்துக்குரிய தொன்றாகியிருக்கிறது.  இவர்களின் முடியலங்காரத்தைத் தீர்மானிப்பதில் சினிமா பெரும் பங்கு வகிக்கிறது. வெற்றிப்படக் கதாநாயகர்கள் தமது ஒவ்வொரு படத்திலும் பின்பற்றும் பாணி படம் வெளியான கையுடன் கிராமப் புற முடியலங்கார நிலையங்களைக் கூட வந்தடைந்து விடுகிறது.. ஆனாலும்; தலைமுடியை நீளமாக வளர்க்கும் மேலை நாட்டு மோகம் நகர்ப்புறங்களை ஓரளவுக்கு ஆக்கிரமித்தாலும் கிராமப்புறங்களை அது இதுவரை எட்டியும் பார்க்கவில்லை என்றே கூற வேண்டும். பெண்களைப் பொறுத்து கிராமப்புறங்களில் தலைமுடியின் நீளம் பிரதான அம்சமாகக் கருதப்படும் அதேசமயம் நகரப்புறங்களில் அதன் வடிவமே பிரதானமாகக் கருத்தில் கொள்ளப்படுகிறது. 'குட்டை முடி நாகரீகம்'; என்ற நகர்ப்புறச் சிந்தனைக்கு  கிராமங்களுக்குள்; வலுவாக ஊடுருவும் வல்லமை இல்லை என்றே சொல்ல வேண்டும். அழகுணர்ச்சியினால் தன்னை அழகுபடுத்தும் தன்மையை விடவும் திருமணத்துக்குத் தன்னை தயார்படுத்தும் தன்மையே அதிகமாக இருப்பதனால் பெண்களின் அலங்காரங்களில் ஆண்களுக்குப் பிடித்தமான அம்சங்கள் கருத்தில் அதிகம் எடுத்துக்கொள்ளப்படுகின்றன.  நாகரீக மாறுதலுக்கேற்ப எவ்வளவு தான் தலை முடியைச் சுருட்டிக் குட்டையாகக் கட்டினாலும் களியாட்ட விழாக்கள் சடங்குகளின் போது அடர்த்தியாகவும் நீளமாகவும் தோற்றமளிப்பதற்கான சிறந்த உத்தியாக முதல் நாட் பொழுதே தலை முடியை வரிந்து பின்னி அடுத்த நாள் அதனைக் கவனமாகப் பிரித்தெடுத்து, விரித்து ,தளரத் தளரப் பின்னி எவ்வளவு நீளமாக இருக்க முடியுமோ அவ்வளவு நீளமான தோற்றமாக்குவதற்கான சகல உத்திகளையும் மேற்கொள்ளும் பாங்கு பரிதாபத்துக்குரியது மட்டுமல்ல ரசிக்கக கூடியதும் தான்..  உடலைக் காயப்போடுதலுக்கும் தலை முடி உதிர்தலுக்கும் நெருங்கிய தொடர்புண்டு என்ற அறிவு பெரும்பாலான பெண்களுக்குத் தெரியாது. இதனால் உடலைக் குறைக்கும் நோக்குடன் உணவைக் குறைக்கும் செயற்பாட்டில் இறங்கி முடி வளர்வதற்குத் தேவையான சத்துக்களை இழப்பது தெரியாமல் 'கரை சேரும் வரையிலாவது பிள்ளைக்கு முடி கொட்டக் கூடாது' என்று தாய்மார் கடவுளை வேண்டுமளவுக்கு முடி தொடர்பான கவனம் எமது சமூகத்தில் சற்று அதிகமாகவே உள்ளது. வளரிளம் பருவத்தின் ஆரம்பக் கட்டங்களில் தலைமுடியை அழகுபடுத்தும் கவனமே இருப்பதன் காரணமாக 'பறக்கப் பறக்கத் திரியும் விருப்பத்தில்' அடிக்கொருதரம் தலைமுடியைச் செயற்கைச் சுத்தமாக்கிகளினால் ((zampoo ) குளிப்பாட்டுவதும் இதன் தாக்கம் கூடி தலைமுடி தன்னிச்சையாக உதிரத் தொடங்கவும் இயற்கைச் சுத்தமாக்கிகளை – விருப்பம் இல்லாவிடினும் கூட –நாடுவதும் இங்கு இயல்பானதாகும்.

அழகுக்கு அழகூட்டி---
அழகு சாதனங்களைத் தன்னுணர்வுடன்  பயன்படுத்தத் தொடங்கும் காலப் பகுதியாக வளரிளம் பருவம் அமைகிறது. நகர்ப்புறக் கடைகளில் பெரும்பாலானவை பெண்களுக்கான அழகுசாதனப் பொருட்களை விற்பவையாகவே உள்ளன. அழகுப் பொருட்களின் பாவனையானது 'நான் குழந்தைப் பருவத்தைத் தாண்டிவிட்டேன். என்னை இனிப் பெண்ணாகக் கருதுங்கள்' என்பதைச் சொல்லாமல் சொல்வதேயாகும். எமது சமூகத்தைப் பொறுத்தவரை அதி கூடிய பாவனையில் இருப்பது முகப்பூச்சுக்கெனப் பயன்படுத்தப்படும் பவுடர் கிறீம் வகைகள். அது ஏற்படுத்தும் இரசாயனத் தாக்கங்கள் பற்றிய தூர நோக்கு எவருக்குமே இல்லை. எனினும் இவற்றைப் பயன்படுத்துவதில் ஒரு ஒருமைப்பாட்டை உருவாக்குவதில் எமது சமூகம் வெற்றி பெற்றிருக்கிறது என்றே சொல்ல வேண்டும். ஆரம்ப காலங்களில் முகத்தை வெள்ளையாகவும் ஒளியுடையதாகவும் ஆக்கும் கிறீம் எது என்பது தொடர்பாக கருத்துக் குழப்பம் ஒன்றுக்குள் சமூகம் உட்பட்டிருந்தபோது விளம்பரங்களை நம்பி ஒரு பொருளிலிருந்து இன்னொரு பொருளுக்கு அடிக்கடி மாறும் போக்கினால் எண்ணற்ற வகையில் இந்திய உற்பத்திப் பொருட்கள் எமது மண்ணை ஆக்கிரமித்திருந்தன.. ஆனால் தற்போது முக அழகுக்கு உடனடி நிவாரணி கயசை யனெ டுழஎடல என்ற கிறீம் மட்டுமே என ஆண் பெண் இருபாலாரையும்; நம்பச் செய்வதில், பாவித்த சொற்ப காலத்துக்குள்ளேயே முகத்தில் ஏற்படும் நிறமாற்றமும், தொலைக் காட்சி ஊடகம் மூலமான விளம்பரமும்; வெற்றி பெற்றிருக்கின்றன. நகரம் கிராமம் என்ற பேதமின்றி மூலை முடுக்கெல்லாம் இந்தக் கிறீம் பரவி விட்டது. வளரிளம்பருவத்தையும் கடந்து முதிர்பருவம் முழுமையும் இதன் பாவனை வேரோடியிருப்பதை நாம் கவனத்தில் கொள்ள வேண்டும்.; முகத்துக்கு அழகூட்டுவதற்குப் பதில் தனக்குள்ளே உள்ள இரசாயனச் சேர்க்கையினால் முகத்தை வெளிறச் செய்வதனூடாகவே இந்த வெள்ளை நிறம் பெறப்படுகின்றது என்பதையோ இதன் பாவனையை முற்றாக நிறுத்தும் ஒரு காலப்பகுதியில் முகத்தின் தோல் முற்றாகச் சுருங்கி, கறுத்துப் புள்ளிகள் முகம் முழுவதும் பரவும் என்பதையோ சிந்திப்பதற்கு எவருமே தயாராக இல்லை பயற்றம்மா, கடலை மா, எலுமிச்சம் பழம், பாலாடை, தயிர் போன்ற தீங்கு விளைவிக்காத இயற்கையான அழகுப் பொருட்கள் கிராமங்களிலிருந்து எப்போதோ விடை பெற்று விட்டன. 'இயற்கையான எலுமிச்சம் பழத்திலிருந்து உருவாக்கப்பட்ட----' என்ற வாசகங்களைப் பயன்படுத்தி தமது பொருட்களைச் சந்தைப்படுத்தும் விற்பனையாளர்களின் யுக்தி கிறீம் வகைகளில் காணப்படும் இரசாயனத் தாக்கம் பற்றிய கொஞ்ச நஞ்ச சந்தேகத்தையும் இல்லாமலாக்கி விட்டிருக்கிறது. நகர்ப் புறங்களில் உதட்டுச் சாயம் முக்கிய அழகுப் பொருளாகக் கருதப்படுகிறது. கிராமங்களை நோக்கி இதன் நகர்வு குறைவு எனினும் அண்மைக் காலங்களில் பண்டிகைகள்;, சடங்குகள், விசேட நிகழ்வுகள் போன்றவற்றில் அதன் பாவனை அதிகரித்திருப்பது அண்மைக் கால மாற்றங்களாகவே கொள்ள முடியும். அதிலும் புலம் பெயர் மக்கள் தமது உறவுகளை நாடி இங்கு வரும்போது இவற்றையும் காவிக் கொண்டு வருவது இத்தகைய மாற்றத்திற்கான பிரதான காரணமாகக் கொள்ள முடியும்.

ஆள்பாதி ஆடை பாதி
ஆள்பாதி ஆடைபாதி என்ற முதுமொழியே ஆடையின் முக்கியத்துவத்தை விளக்கப் போதுமானதெனினும் வளரிளம் பருவத்தினரைப் பொறுத்து அவர்கள் ஆடையின் நேர்த்திக்குக் கொடுக்கும் முக்கியத்துவத்தைவிடவும் அதன் பெறுமதிக்கும் நவீனபாணிக்கும் கொடுக்கும் முக்கியத்துவமே அதிகமாகும். 'நான் இன்னும் சின்னப்பிள்ளை அல்ல' என்பதை வெளிப்படுத்தும் ஆவலை அவர்களது ஆடைத் தெரிவில் கண்டு கொள்ள முடியும். இங்கும் கூட சிந்தனைக்கும் செயற்பாட்டுக்குமிடையில் ஒரு முரண்பாட்டை நாம் அவதானிக்கலாம்.; வளரிளம் பருவம் முழுமையும் பாலூக்கம் உச்சமாக இருப்பதன் காரணமாக தோற்ற அமைவு. உறவுகளைத் தீர்மானிப்பதில் கணிசமான பங்கினை ஆற்றுகிறது  இதனடிப்படையில் உடலமைப்பைச் சரியாக வெளிக்காட்டும் ஆடைகள் இவர்களின் விருப்பத்துக்குரியவையாக இருக்கும் அதேசமயம் குடும்பச் சூழலிலிருந்து முற்றாக விடுபட்டு, தமது தனித்தியங்கும் ஆற்றலுக்கு உறுதுணையாக அமையும் சகபாடிகள் வட்டத்திலிருந்து தம்மை அன்னியப்படுத்தும் எதனையும் - தமக்கு விருப்பமாக இருப்பினும் கூட- பின்பற்ற விரும்பாது அவர்கள் அணியும் ஆடைகளையே –தமது உடலுக்கு அவை பொருந்தாவிடினும் கூட- தெரிவு செய்யும் போக்குக் காரணமாக உடலுக்குப் பொருத்தப்பாடா அல்லது பெறுமதியும் நவீனமுமா என்ற குழப்பத்தில் மிகச் சிலரே இவை இரண்டிலும் வெற்றி பெறும் வாய்ப்பு இருப்பதை பார்க்க முடிகிறது. எமது சமூகத்தைப் பொறுத்து சமூக பொருளாதார அந்தஸ்தை எடுத்துக் காட்டுவதற்கான குறியீடாகவே  ஆடையணிகள் கருதப்படுகின்றன எனினும் வளரிளம் பருவம் இது தொடர்பாக சற்று கூடுதல் கவனம் செலுத்துகிறது. கட்டடவேலை, தோட்ட வேலைக்குப் போகும் இப்பருவத்தினர் கூட மண் கல் என்பவற்றுடன் மல்லுக் கட்டுவதற்கான பழைய ஆடைகளைப் பையில் வைத்துக்கொண்டு மிக அழகாகவும் நவீனபாணியிலும் அலுவலகத்தில் பணி செய்பவரின் தோற்றத்தில் உடையணிந்து செல்வதை நாம் பார்க்க முடியும். தன்னைப் போல் தனது பிள்ளையும் உடலுழைப்பில் கிடந்து மாயக்கூடாது என்ற அவாவில் பெற்றோரால் மிகக் கஷ்டப்பட்டு பள்ளிக்கு அனுப்பப்படும் பிள்ளையும் கூட தானும் சமூக பொருளாதார அந்தஸதில் சற்றும் குறைந்தவன் அல்ல என்று தனது சகபாடிகள் மத்தியில் எடுத்துக்காட்டும் ஒரே நோக்குடன் இந்த நவீன பாணி ஆடைகளை எப்பாடுபட்டாவது அணிவதனையும் நாம் காண முடியும். வளரிளம் பருவத்தின் ஆரம்பக் கட்டங்களில் அதிகமாக விரும்பப்படும் கண்ணைப்பறிக்கும் நிறங்களும் அணிகலன்களும காலம் செல்லச் செல்ல குறைந்து கொண்டு செல்லும போக்கு உண்டு. முதிர்பருவ ஆண்கள் ஆடையின் நேர்த்தியில் கவனம் செலுத்துவது மட்டுமன்றி புகழ்பெற்ற உற்பத்தியாளரின் ஆடைகளை வாங்குதலை அந்தஸ்தின் சின்னமாகக் கருதுகின்றனர். பெண்கள் இதற்கு மாறாகத் தமது பொருளாதார அந்தஸ்தை வெளிப்படுத்தும் பிரதான குறியீடாக ஆடையணிகளைப் பயன்படுத்துகின்றனர்.

குழந்தைகள் உலகமும் ---

குழந்தைகள் உலகமும் 
மனித நடத்தைக் கோலங்களும்

குழந்தைகள் உலகம் - உலகத்தின் சந்தோசங்கள் யாவும் பரிணமிக்கும் உலகம், கவலை, வெறுப்பு சந்தேகம், வஞ்சகம், சூது போன்ற மனித பலவீனங்கள் சட்டென ஆக்கிரமிக்க முடியாத உலகம். மனித மனத்தின் தேடல்களின் பிறப்பிடம் சுறுசுறுப்பு, குறும்பு, துருவி ஆராயும் ஆர்வம் என்ற தனித்துவ பண்புகளின் இருப்பிடம் சொல்லிக்கொடுத்து கற்பவற்றை விட கண்ணால் பார்த்து கற்பவைகள்தான் இவ்வுலகில் அதிகம். இங்கு ஏற்படும் மனப்பதிவுகள் கல்லில் எழுத்துப் போல் அழியாவரம் பெற்றவை. 

குழந்தைகள் உலகம் கவலையே அறியாதது. குதூகலமும் களிப்பும் நிறைந்தது. ஏழை, பணக்காரன், உயர்ந்தவன், தாழ்ந்தவன், நல்லவன், கெட்டவன் என்ற வேறுபாடுகளே அதற்குத் தெரியாது. ஒற்றுமை உணர்வும் பரஸ்பர அன்பும் கொண்டது. அன்பை அளவுக்கு அதிகமாக வாரி வழங்குவது போன்றே தானும் அடுத்தவர் அன்புக்காக அளவுக்கதிகமாக ஏங்குவது.

குழந்தைகள் உலகம் மிகவும் சின்னஞ்சிறியது. பெரியவர்களாகிய நாம் இவ்வுலகில் நுழைவது என்பது மிகவும் கடினமானதொன்று குழந்தைகளிடம் இயல்பாகவே காணப்படும் அன்பு, பரந்த மனப்பாங்கு, நகைச்சுவை உணர்வு, துடிப்பு யதார்த்தத்தை அறியும் ஆவல் போன்ற பண்புகள் எதுவுமே சிதைக்கப்படாமல் இவ்வுலகிற்குள் நுழைவது என்பது சாத்தியமானதா? என்ற அங்கலாய்ப்பும் ஆதங்கமும் ஏற்படுத்திய உந்துதல் இவ்வுலகை சற்று கூர்ந்து அவதானிக்கச்செய்தபோது ஏற்படுத்திய மன அதிர்வுகள்தான் இத்தரிசனங்கள்.

தரிசனம் 1

'அம்மா தம்பி எனக்கு விஸ்கற் தரமாட்டானாம்' இது 8 வயது குமணனின் ஏக்கம் தொனிக்கும் குரல்.

'அவற்றை படிப்பின்ரை வள்ளல்லை அவருக்கு விஸ்கற்'

'தம்பி முதலாம் பிள்ளையாம் அது தான் வாங்கிக் கொடுத்தது' ' நீ முதலாம் பிள்ளையாய் வந்தால் உனக்கும் வாங்கித்தரலாம்'. இது தாய் மாதவியின் குரல்.

பிஸ்கற் மட்டுமல்ல வீட்டில் சமையல் விருப்பமான இனிப்புப் பண்டங்கள் வெளியில் உலாத்து எல்லாமே இளையவன் ரமணன் விருப்பப்படிதான். இத்தனை செல்வாக்கும் அவனுக்கு இருக்கக் காரணம் வகுப்பில் முதலாம் பிள்ளையாக இருத்தல் என்ற தாயின் அபிலாசையை நிறைவேற்றியமைதான்.

திறமைக்கு அதிக கவனம் கொடுத்த அந்தத் தாய்மை பகிர்ந்துண்ணும் பழக்கத்தை மட்டும் தனது பிள்ளைக்கு கற்றுக் கொடுக்க மறந்தது ஏன்? அன்பையும் மனித நேயத்தையும் வளர்க்க வேண்டிய தாய்மை அந்தஸ்து எனும் போர்வைக்குள் ஏன் முடங்க வேண்டும்?.

எனக்குத் தா என்று அழுது அடம்பிடித்து தனக்குரியதை மூத்தவன் பெற்றிருந்தால் இங்கு கலங்க வேண்டிய தேவை இல்லை. அல்லது குழந்தைமைக் குணங்களில் ஏதோ ஒன்றாவது அவனிடம் இருந்தாலும் வருந்த வேண்டியதில்லை. ஆனால் அந்த முகம் என்ன சொல்கிறது?.

ஆழமான அமைதியும் ஏக்கமும் விரவிக் கிடக்கும் அந்தத் தளிர் அப்படி ஒன்றும் மொக்கன் இல்லை. வகுப்பில் பத்துக்குள் வருவான். பள்ளிக்கூடத்தில் போடும் புள்ளிகள் திறமையை நிர்ணயிக்க முடியுமா?. வெரித்தாஸ், பி.பி.சி என்றால் எங்கிருந்தாலும் ரேடியோ முன்வந்து செய்தி கேட்பவன். மை முடிந்த ரெனோல்ட் பேனையில் ' ஏவுகணை' விடத் தெரிந்தவன்.யார் எது கொடுத்தாலும் தம்பிக்கு கொடுத்து தின்பவன். விழுந்து அடிபட்டு அழும் பக்கத்து வீட்டுச் சிறுவனை சமாதானப்படுத்தி சிரிக்க வைப்பவன். விளையாட்டு, பேச்சு என்று எல்லாவற்றிலும் முன்னுக்கு நிற்பவன் மொக்கன் என்றா அந்தத் தாய்மை நினைக்கிறது. தனது அலுவலக நண்பர்கள் முன் பெருமையடித்துக் கொள்வதற்கு அந்தக் குணங்களை விடவும் ' முதல் இடம்' என்ற முத்திரை அவசியமாய்ப் போய்விட்டதா?.

தரிசனம் 2

பக்கத்து வீட்டுப் பூமணியின் இரண்டு வயது மாறனுக்கு கொஞ்ச நாளாய் உடல், உள நிலையில் கோளாறு. இரவில் தூக்கம் அடியோடு இல்லை. சிரித்து விளையாடிக்கொண்டு இருப்பவன் திடீரென வீரிட்டுக் கத்துவான். பயத்தில் தேகம் பதறும். எதைக்கண்டு இப்படிப் பதறுகிறான் என்று எல்லோருக்கும் ஒரே கவலை.

'அம்புலி' யைக் காட்டி சோறு தீத்தும் தந்திரம் இவனிடம் மட்டும் நடக்கவில்லை. நிலவைக் கண்டாலே வீரிட்டுக் கத்தத் தொடங்குவான். அதுவும் வளர்பிறை தொடங்கிவிட்டால் இது ஒரு பிரச்சனை அன்பாகச் சொல்லி அரவணைத்துக் கேட்டும் எதுவுமே விளங்கவில்லை கடைசியில் மிரட்டியும் தூங்க வைக்க முயற்சித்தாகிவிட்டது.

நடு இரவு 'அம்மா யன்னலை மூடுங்கோ' பயத்தில் குளறிய குரல். யன்னல் ஊடாக பூரண நிலவு ஒளி உமிழ்ந்து கொண்டிருந்ததை பார்த்த பூமணிக்கு நிலைமை விளங்க யன்னலை மூடிவிட்டு குழந்தையை அணைத்துக் கொண்டவள் நிலா நிலா ஓடி வா எனக் குதூகலிக்கும் குழந்தை இப்படி அலறக் காரணம் என்ன? என்பது புரிய மறுக்க யோசனையுடன் கிடந்தாள். சில நிமிடம் கழிந்த பின் அம்மா நாளைக்கும் இப்படி பரா லைற் வருமே மெல்ல காதில் கிசுகிசுத்தான் குழந்தை. 

பரா லைற் அடிக்குது ஆமி வரப்போறான் என்று அலறித்துடித்து இடம்பெயர்ந்த மக்கள் கூட்டத்தில் பூமணியும் அவள் மகன் மாறனும் அடங்குவர். இடப்பெயர்வின் அவலம் மிக மோசமாக அவனைப் பாதித்துவிட்டது. 

தரிசனம் 3

கீதாவின்ரை வீட்டுக்கு விளையாடப் போகவேண்டாம் என்று நிஷாந்திக்கு அம்மா எத்தனை தரம் சொன்னனான்.

'ஏன் போகக்கூடாது அம்மா?' ஆண்டு இரண்டு படிக்கும் நிஷாந்தியின் கேள்வி இது. அவையளோடை நாங்க பழகிறது இல்லை அவை எங்கடை ஆக்கள் இல்லை, அவையளோடை பழகிறது எங்களுக்கும் அப்பாவின் உத்தியேகத்திற்கும் கௌரவமில்லை.

காலையில் தனக்கும் தாய்க்கும் நடந்த உரையாடலை நிஷாந்தி மறந்து விட்டு சாப்பிட்டதும் விளையாட ஓடிப்போய்விட்டாள்.

தகப்பனின் தொழில் இதுதான் என்று அறுதியிட்டு கூறமுடியாத ஏழை கீதா. ஆனால் உயர்வு தாழ்வு என்ற பேதம் இந்த இளம் தளிர்களுடன் ஊடுருவ முடியாத பருவம் இது. விளையாட்டு....  அது ஒன்றுதான் அந்த மனங்களை ஆக்கிரமித்து நிற்கும்  பருவம்.   கீதாவின் குடிசை முன்னின்ற வேப்பமரத்து முன்றலில் அவர்களின் விளையாட்டு தொடர்ந்தது. திடீரென கையில் பூரவசம் கம்புடன் ஆவேசமாக வந்த நிஷாந்தியின் அம்மா 'உன்னை எத்தனை தரம் சொன்னான் அந்தச் சனியங்களோடை விளையாட வேண்டாமென்று. அடித்து இழுத்துக் கொண்டு தாய் போக ஏன் விளையாடக் கூடாது என்ற காரணம் கொஞ்சம் கூட தெரியாததால் இரு இளம் தளிர்களும் பரிதாபம் ....   விளிகள் கக்க நின்றன.

தரிசனம் 4

இடப்பெயர்வின் அவலம் மட்டுமா எம்மைத் துரத்துகின்றது. எமது அறியாமை காலம் காலமாக எம்மைச் சிறைக்குள் அடைப்பதை நீங்கள் பார்க்கவே இல்லையோ? என்று இந்தச் சிறுமியின் கண்கள் கேட்பது போல் தெரிகிறதே. ஆம் மூத்த பிள்ளையாகப் பிறந்துவிட்டதால் தானோ படிப்பின் வாசனையை என்னால் அறிய முடியாமல் போனது. எனது தாயின் சுமையைப் பகிர்வதற்கு என்றுதான் நான் படைக்கப்பட்டிருக்கிறேனோ?.

ம்...ம்.. அவன் தான் என்ன செய்வான், அவள் தான் என்ன செய்வாள் அவளின் தலையில் ஏற்பட்ட சுமைகளை இவ்வளவு காலமும் சுமந்து இருக்கிறாள்... சற்று இறக்கி வைக்க சந்தர்ப்பம் கிடைத்தால் அவள் விட்டு விடுவாளா? தான் பட்ட சுமையை தன் குழந்தையும் படக்கூடாது என்ற அறிவை அவள் பெறுவதற்கு வாய்ப்பு கிடைக்கவில்லையே அவளுக்கு என்று என்னை நோக்கி கேட்பது போல் இல்லை? அவளது பார்வை.

அந்தக் குழந்தையின் கையில் இன்னொரு குழந்தை. குழந்தையைப் பெற்றுக் கொள்ளாமலேயே தாயின் பொறுப்பு வந்துவிட்டது அவளுக்கு. துள்ளித்திரிய வேண்டிய பருவத்தில் உடலை அசைக்கவே முடியாத சுமை தன்மீது பலவந்தமாக ஏற்றப்பட்ட சுமையினால் உணர்வுகள் பாதிக்கப்பட்டிருக்கும் இந்தக் குழந்தை எவ்வாறு இன்னொரு குழந்தையின் உணர்வுகளைப் புரிந்து கொள்ள முடியும்? ஆற்றாமை அச்சுறுத்தலாக வன்முறையாக உருவெடுக்கிறது. குழந்தையின் மீது திணிக்கிறது. இங்கு குற்றவாளி யார்? தாயா? இல்லை.. அப்போ குழந்தையா... இல்லவே இல்i. அப்போ இது புரியாத புதிர் விடை தேடி அலைய வேண்டியதுதான்.

ஓரிரு எடுத்துக்காட்டாக இல்லாத சமூகத்தில் பரவலாக வெளித்தெரியும் இந்த உளவியல் தாக்கங்கள் தான் குழந்தைகள் உலகைப் பெருமளிவில் ஆக்கிரமித்திருக்கிறது. குழந்தையின் எண்ணங்களிற்கும் அவர்களது நடவடிக்கைளுக்குள் ஆழப்புகுந்து அவர்களின் இனிமை, குதூகலம், ஆர்வம், குறும்பு போன்ற பண்புகளுக்கூடாக இவ்வுலகின் சமூக அம்சங்களை அவர்களுக்கு எடுத்துக் காட்ட வேண்டிய பாரிய பொறுப்பு எமக்கு உண்டு.

ஏனென்றால்!

ஒரு சமூகத்தின் எதிர்காலம் ஒப்படைக்கப்பட்டிருப்பது இந்தப் பிஞ்சுகளின் கைகளில் தான். சமூகத்தை தாங்குவதற்கு முதல் தேவை அன்பும் மனித நேயமும் தான். அன்பும் மனித நேயமும் என்ற அடித்தளத்தில் நின்றுதான் குழந்தையின் அறிவு தேடல் ஆரம்பிக்க வேண்டும். குழந்தையின் அறிவை வளர்க்க நாம் வாங்கிக் கொடுக்கும் புத்தகங்கள் விளையாட்டுப் பொருட்களை விடவும் எமது பேச்சு, செயல், பழக்க வழக்கம், மனித பலவீனங்களான பேராசை, வஞ்சகம், பொறாமை போன்றவை குழந்தையின் மனதை இலகுவில் ஆக்கிரமிக்க வல்லவை.

ஒரு குழந்தையை அன்புள்ளவனாக, மனித நேயம் மிக்கவனாக, சமூக உணர்வும் பற்றும் மிக்கவனாக, அறிவு ஜீவியாக வளர்ப்பதற்கு சிறந்த பருவம் குழந்தைப் பருவம் தான். குழந்தைகள் உலகை தாக்கும் காரணிகளை இனங்கண்டு எம்மால் முடிந்தவரை மாற்ற முயல்வது தான் எதிர்கால எமது சமூகம் எமது காலல் தாங்கி நிற்க உதவும் ஒரே வழி.